Europako banketxeek kredituak murriztu dituzte

Interes tasen igoeraren eta finantza gorabeheren ondorioz, Europako banketxeek kredituak murriztu dituzte, finantza erakundeek espero baino intentsitate handiagoan. Hala dio Europako Banku Zentralak  euroguneko lehen hiruhilekoan kreditua emateari buruz egin duen azken inkestak. Hain zuzen ere, 2011ko krisiaz geroztik kreditu emanean murrizketa gehien ezarri dituzten unean gaude.  

Europako Banku Zentralak (EBZ) martxoaren 22tik apirilaren 6ra bitartean egin zuen inkesta, eta informazio baliotsua lortu du ostegun honetan interes tasei buruz egingo duen hurrengo bilerari begira. Izan ere, inkestaren arabera, kredituen gogortzea banketxeek aurreko hiruhilekoan aurreikusitakoa baino handiagoa izan da, eta maileguen dinamika etengabe ahuldu da.

Aurreikuspen ekonomikoekin eta konpainien egoera zehatzarekin lotutako arriskuak dira kreditu emakida gogortzeko irizpide nagusiak, baina horiei, EBZk azaldu duenez, bankuek arriskuarekiko tolerantzia txikiagoa izatea gehitu behar zaio. Silicon Valley Banken porrotaren ondorioz zabaldu da bankuen artean maileguak emateko beldurra, eta etxebizitzetarako kredituetan nabari da gehien.  

Bankuek lehen hiruhilekoan kredituak emateko irizpideak gogortu egin dira euroguneko herrialde guztietan. Hipoteken kasuan, murrizketa hori bat dator euroguneko lau ekonomia handiekin (Alemania, Frantzia, Italia eta Espainia), baina are nabarmenagoa da Alemanian eta Espainian kontsumorako kredituetan eta etxeetako gainerako finantzaketan.

Bigarren hiruhilekoari begira, euroguneko bankuek kreditua murrizten jarraitzea aurreikusten dute, baina lehen hiruhilekoan ikusitakoa baino intentsitate txikiagoarekin. Datozen hilabeteetan, hain zuzen ere, EBZk pandemiaren ondorioz emandako TLTRO finantzaketa lerroak itzultzeak likidezian izango duen eraginari aurre egingo diote bankuek; izan ere, finantzaketa kostu eroso bat ziurtatzen lagundu zuten sektorearentzat, kreditu emate arina bermatzeko. Erakundeek inkestan aipatzen dute, hain zuzen ere, TLTRO lineen itzulketa hori dela kredituen emakida gogortzeko arrazoietako bat. Ekaina une erabakigarria izango da, hilabete horretan amaitzen baita duela hiru urte 1,308 bilioi euroren truke emandako TLTRO likidezia lerro erraldoia, eta 476.000 milioi euro itzultzeke daude oraindik.

Gaur argitaratutako kreditu emakidari buruzko inkesta erreferentzia garrantzitsua da EBZren hurrengo tas -erabakirako. Ekonomia hozten ari dela erakusten du, finantzaketa eskaera txikiagoarekin eta bankuak maileguan emateko jarrera txikiagoarekin, eta horrek balantza ostegun honetan oinarrizko 25 puntuko igoeraren alde jar dezake. Tasa igoerarik txikiena izango litzateke iazko uztailean EBZk eurogunean diruaren prezioa aireratzen hasi zenetik.