Espainiako Kontsumoko Prezioen Indizeak (KPI) lau hamarren egin du gora urrian iraileko datuekin alderatuz, baina 1,6 puntu jaitsi da urte arteko tasa, %7,3an kokatuz. Hala diote Espainiako Estatistika Institutuak (INE) argitaratutako behin-behineko azken datuek.
Behin-behineko datu horien arabera, uztailetik 3,5 puntu jaitsi da urte arteko inflazioa. Orduan, urte arteko KPIa %10,8koa izan zen, 1984ko irailetik egondako altuena. Datu horiek kontuan, esan liteke, beraz, inflazioak hirugarren hilabetez jarraian egin duela behera urte arteko tasan: abuztuan hiru hamarren egin zuen behera, %10,5ean kokatuz; irailean 1,6 puntu %8,9an kokatuz; eta urrian beste 1,6 egin du behera %7,3raino.
Batez ere, elektrizitatearen prezioen jaitsierak eta, neurri txikiagoan, gasaren merkatzeak ekarri dute urte arte indizea %7,3raino jaistea.
Energia eta elikagai freskoak kontuan hartu gabe kalkulatzen den azpiko inflazioan, aldiz, ez da aldaketarik izan. Irailean %6,2an kokatu zen, eta urrian, mantendu egin da.
Hala ere, urriko datuak behin-behinekoak dira, INEk datorren hilaren erdialdean baieztatu beharko du behin-betiko datua.