Basque Culinary Centerren graduatua, Ane Lore Lasa sukaldaritzan duen talentuagatik eta pasioagatik nabarmentzen da, bihotzarekin lan eginez eta beti bere ukitu paregabea emanez. Obrayan Garcia bikotekidearekin batera, 2023ko azaroaren 9an R jatetxea zabaldu zuen Donostian. Bertan, sinpletasuna eta zaporea uztartzen dira Mexikoko eragina duen merkatuko sukaldaritzan, beti sasoiko produkturik onena erabiliz. Karta txiki bat eskaintzen dute, urtaroen eta merkatuaren arabera aldatzen doana. Bere "sukaldaritza fresko eta zaporez beteak" ahosabaiak konkistatzen eta esperientzia gastronomiko ahaztezinak sortzen jarraituko duela agintzen du.
Nola sortu zen R jatetxea sortzeko ideia?
Obryan eta biok Bruno Oteizaren Gatxupa Jatetxea zuzentzen aritu ginen 5 urtez. Denbora hori igarotakoan, erabaki genuen hegan egitea eta gure jatetxea sortzea, bertan ikasitako guztiari esker. Dagoeneko ia 10 hilabete daramatzagu irekita, 2023ko azaroaren 9an ireki baikenuen.
Zer sukaldaritza teknika erabiltzen dituzue jatetxean?
Egiten dugun sukaldaritza oso erraza da; ez zaizkigu etiketak gustatzen. Merkatuko sukaldaritza egiten dugu, eta euskarazko erre aditzean oinarri duen R jatetxearen izenak ondo dioen bezala, parrilla asko erabiltzen dugu. Gure platerak sinpleak dira, produktua dute protagonista, zapore handikoa. Beti izaten dugu mexikar ukituren bat, Obrayan bertakoa baita.
Jatetxearen izena euskarazko "erre" aditzetik dator | Argazkia: utzitakoa
R euskarazko erre aditzetik datorrela aipatu duzu. Zergatik dena txingarretan egiteko erabaki hau?
Kulturalki biok lotzen gaituen gauzetako bat dela uste dugu. Mexikon “tatemar” hitza erabiltzen da osagaiak zartagin edo parrilla oso bero batean erretzeko ekintzari erreferentzia egiteko. Keinu horrek zaporeak erabat aldatzen ditu, eta asko gustatzen zaigu. Hemen, berriz, batez ere kostaldean, produktu guztia parrillan prestatzen da. Erretzea; hori da gure janaria prestatzeko modua.
Zein da zuen balio erantsia?
R etxea da. Maite dugun guztia eskaintzen dugu: Old Town Coffeeko kafea daukagu, guk kontsumitzen duguna; artisau garagardoak, esku hartze gutxiko ardoen karta eta ardo naturalak ere baditugu. Eta eskaintzen dugun janaria zaporetsua da, desberdina, baina ezagutzeko modukoa. Etortzen den jendea etxean bezala sentitzea nahi dugu.
"Tokiko produktua lortzea ez da gehiago kostatzen. Agian modu desberdinean bilatu behar da, eta ekoizleekin erlazionatu, eta hori luxua iruditzen zaigu"
Zer bezero profiletara dago bideratuta R?
R produktua baloratzen duen edozein pertsonari zuzenduta dago, izan jateko edo edateko. Bere burua askatzeko prest dauden pertsonei, konpainia onean jaten gozatzen dutenei. Hala ere, ez dugu pertsona profil bakarra.
Ekiteari buruz hitz egin dezagun. Zaila al da Euskal Herrian ekitea eta jatetxe bat sortzea?
Esfortzuarekin dena egin daitekeela uste dugu. Gure kasuan, mentalki prestatuta geunden etorri zitzaizkigun eta etorriko zaizkigun erronkei aurre egiteko. Baina zailena ez da irekitzea izan; denboran mantentzea izango da.
Tokiko produktuan jartzen duzue arreta. Garestiagoa da? Zailagoa da lortzea?
Tokiko produktuak ez du zertan garestiago izan. Ez gara luxuzko produktuak erosten dituen jatetxe bat, baina kalitate hobearen alde egiten dugu; garestiagoa da, baina ez du huts egiten, eta, azkenean, bezeroa konturatu egiten da. Halaber, tokiko produktua lortzea ez da gehiago kostatzen. Agian modu desberdinean bilatu behar da, eta ekoizleekin erlazionatu, eta hori luxua iruditzen zaigu.
Ekoizle txiki eta ekintzaileekin egiten duzue lan. Horrek zer-nolako eragina du ekonomian?
Guretzat nor garen eta zer nahi dugun definitzen du. Gu bezalako pertsonei laguntzearen aldeko apustua egiten dugu, beren lana maite dutelako eta duten produktua enpresa handiago batena baino kalitate handiagokoa delako. Haientzat, aldiz, hazten jarraitzea da, babestuta sentitzea eta pixka bat gehiago ezagutaraztea, jendeak euren lana ere balora dezan.
"Esfortzuarekin dena egin daitekeela uste dugu. Gure kasuan, mentalki prestatuta geunden[...]. Baina zailena ez da irekitzea izan; denboran mantentzea izango da"
Gaur egun zer balio du hurbileko produktuak?
Izugarrizko balioa du. Guk argi daukagu: ahal dugun neurrian tokikoa kontsumituko dugu. Jendea hezi behar da urtaro edo urteko une bakoitzean lurrak edo itsasoak ematen diguna balora dezan; izan ere, une horretan dago produktua kalitatetik onenean. Eta, gainera, ekosistema kaltetzea ere saihesten dugu.
Etorkizunera begira, zer urrats ematen jarraitu nahi duzue?
Hilabete batzuk baino ez daramatzagu irekita, eta anbizio handiko galdera da. Baina pertsonalki eta profesionalki hazten jarraitu nahi dugu. R eboluzionatzen joango da, baina beste proiektu batzuk sortzea ere gustatuko litzaiguke.