Balfego enpresa kataluniarraren eta AZTI ikerketa zentroaren Itsas Balfego SL enpresak, atungorria gizentzeko lehen instalazioa sortu nahi dute. Horretarako, bi kaiola urperagarri eraikiko dituzte Getariako kostaldearen aurrean. Hegalaburra inguraketa bidez arrantzatu eta, ondoren, kaiola urperagarrietan gizentzea proposatzen dute, Kantauri Itsasoan neguan gertatzen diren denboraleen ondorio kaltegarriak saihesteko. Horrek aldaketa ekarriko lieke arrantzaleei, tradizioari eutsiz atuna banaka-banaka harrapatu ordez inguraketa bidez harrapatu beharko luketelako.
Bi kaiola zirkular horiek itsaso zabalean eraiki nahi dituzte, 3,688 miliara, eta Getariako portutik gertu.
Sustatzaileek zehaztu dutenez, kaioletan daudenean, hegalaburra astean bospasei egunetan elikatuko dute, arrain urdinarekin bakarrik, eta hilabete batzuk gizendu ondoren, arrainak tamaina egokia hartzen duenean, ale bakoitza banan-banan hilko dute. Proiektuaren arabera, neguan janaria itsasontziz portutik kaioletara eramateko zailtasunaren aurrean, gizentzea harrapaketatik (ekainean edo uztailean) urrira arte egingo da. Halaber, denborale egunetan, kaiolak 40-50 metrora urperatuko lirateke, olatuen talketatik babesteko.
Hasiera bateko asmoa da, proba gisa, 100 hegalabur sartzea kaiola horietan 2023an. Datorren urtean, baina, 150.000 atun kilo sartu nahi dituzte.
2 milioi euro inguru inbertituko dituzte instalazio horretan.