Bilbobuseko langileek greba mugagaberari ekin diote, gaur, asteartea eta ostiralera arte luzatuko da. Urrian hasi ziren mobilizazioen ondoren, gaur hasitako lanuztea 2021etik eguneratu gabe duten lan hitzarmena berritzea eskatzeko da. Greba mugagabearekin hasi baino lehen, atzo, 24 orduko greba zegoen deituta, eta horrekin batera beste manifestazio bat egin zen. Gaur ere manifestazioa egiten ari dira, 09:00etan hasi dena, Bilboko Kale nagusitik abiatuta. 11:30etan emango diote amaiera Udalaren parean.
Jose Fernandez UGT sindikatuko eta Bilbobuseko lan-batzordeko presidenteak greba mugagabeari "errespetuz, zuhurtziaz eta kezkaz" aurre egingo diotela eta gatazka desblokeatzeko aurrerapausorik eman ez dutelako haserre daudela azpimarratu du. Azaldu duenez, ez da inolako harremanik izan enpresarekin eta Udalarekin, eta "erantzukizuna bere gain hartzeko" eskatu die, "bati zerbitzuaren arduradun gisa eta besteari ordaintzen ari zaion zerbitzu horren kontratuaren titular gisa". Fernandezek gogorarazi du zerbitzu hori eman egin behar dela, "funtsezkoa, publikoa eta herritarrek ordaindua" delako.
Bilbobusen zerbitzua kudeatzeko kontratua 2019an sinatu zuten, hamar urterako. Kontratuaren erdia betetzen ari denean, enpresa esleipendunak adierazi du ezin dituela bere gain hartu langileek eskatzen dituzten baldintzak, ez baitzuten aurreikusten KPIa hainbeste igotzea. Egoerari irtenbide bat topatzeko hainbat aukera aztertzen ari dira, besteak beste, kontratuko baldintzak birplanteatzea edo deuseztatzea.