Euroguneko urte arteko inflazioak marka guztiak hautsi ditu, eta %10,7raino igo da urrian. Irailetik urrira, berriz, zortzi hamarren egin du gora Eurostat estatistika erakundeak jakinarazitako datuen arabera.
Sektoreka banatuz, energia izan da berriro ere gehien garestitu den sektorea, %41,9 igo baita urrian; irailean, igoera hori %40,7koa izan zen. Atzetik, elikagaiak, alkohola eta tabakoa garestitu dira, %13,1.
Azpiko inflazioa ere, energia eta elikagai freskoak kontuan hartzen ez dituena, lau hamarren igo da urrian, %6,4raino.
Eurogunean Estoniak (%22,4), Lituaniak (%22), Letoniak (%21,8) eta Herbehereek (%16,8) dute inflazio tasarik altuena. Txikiena Frantziak (%7,1), Espainiak (%7,3) eta Maltak (%7,5).
Bestalde, Eurostat estatistika erakundeak jakitera eman duenez, urteko hirugarren hiruhilekoan %0,2 hazi da Barne Produktu Gordina, bigarrenean baino bost hamarren gutxiago.