ELA, LAB, CCOO, ESK eta Steilas sindikatuek 150.000 funtzionario inguru deitu dituzte euskal sektore publikoan greba egitera bihar. Greba honek iazko azken hilabeteetan, urriaren 25ean eta abenduaren 19an, egindako bi grebei jarraipena emango die. Horietan ere Satseren babesa izan zuten, eta Eusko Jaurlaritzari, aldundiei eta udalei eskatu zieten erosahalmena bermatzeko eta erkidegoko enplegu publikoa sendotzeko, aldi baterakotasuna % 8ra murriztu arte, besteak beste.
Otsailaren 13an, ELAk, LABek, CCOOk, ESK-k eta Steilasek beste greba egun bat deitzeko asmoa agertu zuten, EAEn sektoreko lan-baldintzak negoziatzeko "borondate politiko eza" dela eta. Salatu dutenez, sektorearen lan-baldintzak "erosahalmenaren galera" ekarri du, azken bi urteetan % 8tik gorakoa, eta behin-behinekotasunak "muga historikoa" gainditu du, % 44ra iritsi baita.
Sindikatuen ustez, aurreko greben ostean lan-baldintzak eta zerbitzu publikoak hobetu beharrean, "okerrera egiten ari dira etengabe". Hala, bihar, goizean goizetik, pikete informatiboak egingo dituzte lantokietan, eta ondoren manifestazioak egingo dituzte EAEko hiru hiriburuetan, 11:30etik aurrera.