Bizkaiko Artea herrian egoitza duen E&M Combustion ingeniaritza taldeak Txinako Bodun Biotechnologyren biomasa-planta bere industria-errekuntzako teknologiaz hornituko du. BIOTOC patenteari esker, ekonomia zirkularreko proiektuak garatuko ditu, 40.000 tona erregai ekoitziz urtean, arto-lastotik eta nekazaritzako beste hondakin batzuetatik abiatuta, industriarako eta berokuntza zibileko energia termikoa sortzeko.
Ingeniaritza konpainiak proiektuaren errekuntza-ganbera elikatuko duen erregailua garatuko du. Lantegia Anyang herriko industrialdean dago, Txinako Henan probintziaren iparraldean. Industria aplikazio hau erregaia pelletetan egitean oinarrituko da, tenperatura baxuko pirolisi-prozesu jarraitu baten bidez.
Arteako konpainiak adierazi duenez, arto-lastoaren pirolisi-prozesuak eta gero pellet egonkor bihurtzeak energia jasangarriaren kate logistikoa erraztuko du, haren garraioa eta biltegiratzea hobetuta eta erabilera termikoa sustatuz. Finean, instalazioaren helburua ingurumen kutsadura murriztea dela argitu dute.