Iberdrolak Biodibertsitate Plan berri bat aurkeztu du, 2030ean ekosistemen eta espezieen gaineko eragin garbi positiboa lortzeko, konpainiak ohar bidez jakinarazi duenez.
Plan berri hori Emilio Tejedor Iberdrolako Ingurumeneko zuzendariak aurkeztu du Kanadan egunotan egiten ari den Biodibertsitateari buruzko Munduko Goi-bileran (COP 15). Zehazki, lehendik zeudenak baino ingurumen-baldintza hobeak sortzen laguntzeko beharrezko mekanismoak biltzen ditu planak. Tejedorrek nabarmendu duenez, Iberdrolaren Biodibertsitate Plana "2007tik markatutako bidearen jarraipena da, bere lehen Biodibertsitate Politika onartuta".
Biodibertsitate Planak, hiru jarduera-ildo nagusi ezartzen ditu. Lehenengoak kontabilitate-esparru aitzindari bat ezartzen du, instalazioak eraikitzearen, erabiltzearen eta eraistearen ondorio diren ekosistema eta espezieetan eragin positiboak eta negatiboak kuantifikatzeko. Hala, konpainiak bere helburuaren betetze-maila jarraitu ahal izango du, eta biodibertsitateko ekintza-planak berrikusi ahal izango ditu, helburuak lortzen ari direla bermatzeko.
Planaren bigarren ildoak biodibertsitatea kontserbatzeko eta leheneratzeko ekintzak areagotzeko beharra ezartzen du. Horretarako, Iberdrolak bere teknologia guztietako aktiboen ekintza-planak ebaluatzeko eta berrikusteko helburua jarri du 2025erako, haien eragin-mailagatik edo garrantzi estrategikoagatik lehentasunezkotzat jotzen baitira. 2030erako planak, munduan dituen instalazio guztien planak berrikustea eta berriak sortzea aurreikusten du.
Azkenik, Biodibertsitate Planak aldaketa sistemikoa bultzatzeko beharra jasotzen du, biodibertsitatearen aldeko ekintzaren bidez, kontserbazio-, leheneratze- eta berroneratze-konponbideen ikerketa sustatuz, bai eta beharrezko kultura-eraldaketa lortzeko ezagutzaren transmisioa ere.
Planarekin, Iberdrolak ingurumenaren aldeko aldaketa horren eragile izan nahi du, taldearen plangintza estrategikoko eta erabakiak hartzeko barne-prozesu guztietan biodibertsitatea integratuz.