Iberdrolak Avangriden %18,4 erosteko eskaintza egin berri du. Dagoeneko bere Estatu Batuetako filial honen kapitalaren %81,6 du beregain, eta horrela, filialaren kontrol osoa hartuko luke, energia konpainiak ostegun honetan iragarri duenez.
Iberdrolak 34,25 dolar (31,44 euro) eskaini ditu akzioko, hau da, azken 30 egunetako batez besteko prezio haztatuaren %10 inguruko prima. Hartara, Avangriden %100 bereganatzeko 2.486 milioi dolarreko inbertsioa egingo du (2.280 milioi euro inguru).
Iberdrolak azaldu duenez, eragiketa honen helburua Estatu Batuetako sare-negozioa hedatzea da, "Iberdrolarentzat funtsezkoa den une honetan, kreditu-kalifikazio handiko merkatuetan eta araututako negozioetan hazi nahi baitu, hala nola sareetan".
Avangridek Connecticuten du egoitza, eta gaur egun 44.000 milioi dolar (40.391 milioi euro) ditu aktibo Estatu Batuetako 24 estatutan banatuta. Halaber, bere negozioaren bidez, elektrizitate eta gas naturaleko zortzi enpresa ditu eta, New Yorken eta Ingalaterra Berriko azpieskualdean 3,3 milioi bezero baino gehiagori eskaintzen dizkio zerbitzuak.