Tubos Reunidos Group munduko lehen ekoizlea izango da soldadurarik gabeko zero emisioko hodiak fabrikatzen, ohar batean taldeak ziurtatu duenez. Dagoeneko lehen eskaerak jaso ditu enpresa arabarrak, eta 2024ko azken hiruhilekoan egingo du lehen ekoizpen kanpaina, hodi horren 2.000 tona fabrikatuta. Bere produktuen bertsio hau, O-Next izenekoa, apirilaren 15etik 19ra Düsseldorfen egingo den Tube azokan aurkeztuko da.
Tubos Reunidoseko zuzendari nagusiak, Carlos Lopez de las Herasek, "etengabeko hobekuntza-prozesuan" murgilduta daudela azpimarratu du, eta horrek enpresa osoa inplikatzen duela euren prozesuak eta produktuak "jasangarriagoak" izan daitezen. Adierazi duenez, emisio txikiko hodi horiekin produktuen karbono aztarna murriztea posible dela erakusten dute, eta, aldi berean, "industriaren deskarbonizazioan palanka" izatea espero dutela desiratu du.
Plan estrategikoaren parte
Enpresak adierazi duenez, proiektu hau Tubos Reunidosek 2021-2026 plan estrategikoaren barruan egin duen "apustu industrial eta inbertitzailearen" emaitza da. Zehaztu duenez, zero emisio soldadurarik gabeko lehen hodia garatzeko, altzairutegiak bateratzeaz gain, hainbat ekimen jarri dituzte abian; besteak beste, birziklatutako lehengaien erabilera, fabrikazio-prozesuaren hobekuntzak eta lantegietako sabaien gainean 30.000 eguzki-plaka baino gehiago instalatzea.