Teknologiak garatzeko hartu duen abiadak beste pausu txundigarri bat ekarri zigun aurreko astean. Oraingoan, OpenAIk jauzi kuantiko bat eman du bere tresna berriarekin, Sora: ikus-entzunezko edukia sortzeko modua birdefinitzen duen plataforma iraultzailearekin. Argitaratu zenetik, Sorak zalaparta handia sortu du edukien sortzaileen, marketineko profesionalen eta teknologiaren zaleen artean. Zer egiten duen? Testua bideo bihurtu, modu harrigarri, eraginkor eta kalitate onean.
Testu-lerro gutxi batzuk abiapuntu hartuta, Sora gai da bideo osoak sortzeko, narrazio arinak, irudi dinamikoak eta definizio izugarria erabiliz. Aurrerapen horrek edukia sortzeko prozesua bizkortzeaz gain, kalitate profesionaleko bideoak sortzeko aukera demokratizatzen du, beno edo hori diote.
Erreminta hau beste text-to-video inteligentzia artifizialetatik bereizten eta mehatxu egiten duen ezaugarria erabilera eta aplikazio askotara egokitzeko gaitasuna da. Hezkuntzako tutoretzarako bideoak sortzetik, publizitateko edukiak sortzeraino, hamaika aplikazio ditu. Aldaberatasun horrek tresna erabilgarri bihurtzen du Sora, bai enpresentzat eta baita eduki-sortzaile independenteentzat ere. Edo ez? Edozein aurrerapen teknologikorekin bezala, tresna honek eragiten dituen ondorio etiko eta sozialei buruzko galdera saihestezina sortzen da: erreminta ala mehatxutzat du ikus-entzunezko sektoreak? Zenbateraino izan daiteke bidelagun eta zenbateraino ordezkagarri Sorak egiten duena?
Adimen artifiziala gero eta sofistikatuagoa den heinean, funtsezkoa da teknologia hori nola erabiliko den definitu eta gure gizartean zer eragin izango duen kontuan hartzea. Alde batetik, Sora aurrerapauso handia da ikus-entzunezko edukiak sortzeko eraginkortasunari eta irisgarritasunari dagokienez. Baina, bestalde, IAk sortutako edukiaren benetakotasunari eta originaltasunari buruzko kezka legitimoak ere sortzen ditu. Zenbateraino utzi Soraren narrazio eta ekoizpen librerako gaitasuna? Nola ekidin iruzurrak?
Inteligentzia Artifizialak sortutako edukia ugaltzeak kultura-homogeneizazioan eta giza sormenaren aniztasuna galtzera eraman gaitzake eta funtsezkoa da kezka horiei modu proaktiboan helduko dion erregulazio eta babesak ezartzea, teknologia modu etiko eta arduratsuan erabiliko dela bermatuko duen bizi-eremu berri bat. Azken batean, Soraren arrakasta sortzaileen eta erabiltzaileen komunitateak aprobetxatzeko aukeratzen duen moduaren araberakoa izango da. Modu gogoetatsu eta kontzientean erabiltzen bada, Sorak ikus-entzunezko edukiaren mundua are gehiago demokratizatzeko ahalmena izango du, sormen-adierazpenerako eta ideia-trukerako aukera berriak eskainiz.
Dena den, nahiz eta Sorak aurreko astean gu guztiok inpresionatu, tresna oraindik ez dago erabilgarri. Eta jaurtitzen denean ere, denbora asko pasatuko da testua bideo bihurtzeko plataformen kopurua murriztu eta jendeari zein gustatzen zaion erabakitzen hasi arte. Gizartearen gehiengoaren teknologia batekiko adopzio prozesua oso motela da, eta denbora pasako da Soraren eragina ezagutzen dugun arte. Adi egongo gara!