Bizkaiko Foru Aldundiak, Beaz eta Seed Capital sozietateen bidez, eta Estoniako Startup Wise Guys (SWG) bizkortze-enpresak lankidetza-akordioa sinatu dute nazioarteko startup-ak bizkortzeko programa bat abian jartzeko Bilbon, hain zuzen ere BATen, Bizkaia Dorreko nazioarteko ekintzailetza zentroan.
Ekonomia Sustatzeko Saileko diputatu Ainara Basurkok eta Startup Wise Guys-eko arduraduna den Cristóbal Alonsok azaldu dutenez, bizkortze-programak bi edizio izango ditu hasieran (2022 eta 2023) eta asmoa edizio bakoitzean 10-12 startup sortzea da. Alde batetik, Saas, adimen artifiziala, ikusmen artifiziala, blockchain eta 5G teknologien arloko nazioarteko startup hoberenak Bilbo bertatik bizkortu nahi dituzte eta, bestetik, Bizkaian nazioarte mailako startup berriak sortzen eta garatzen lagundu nahi dute.
SWGk 100.000 euro jarriko ditu gehienez parte hartzen duten startupak finantzatzeko; horrez gainera, Seed Capital Bizkaiak beste 100.000 euro ipini ahal izango ditu irizpideak betetzen dituzten startupak finantzatzeko.