Tecnalia eta TranXforma Food elkarrekin ariko dira nekazaritzako elikagaien sektorea eraldatzen
Lankidetzaren helburua nekazaritzako elikagaien industriaren ekosistema sustatzea da, batez ere ETEen artean
Tecnalia ikerketa eta garapen teknologikoko zentroak eta TranXforma Food berrikuntza plataformak bat egin dute nekazaritzako elikagaien industriaren ekosistema indartzeko. Sektore honetako bi eragile giltzarri dira, eta ahaleginak batu eta gaitasunak elkartuko dituzte nekazaritzako elikagaien industriaren eraldaketa iraunkorra bultzatzeko, batez ere, ETEetan eta lankidetza horren esparruan gara daitezkeen proiektuetan arreta jarriz.
Funtsezko sektore batean berrikuntza sustatzea da helburua, ekintzailetza ekosisteman dauden beste tresna batzuk osatuz eta aberastuz. Horretarako, lankidetza hitzarmena sinatu dute maiatzean Bilbon egindako Food4Future azokaren esparruan.
TranXforma Food enpresa txiki eta ertainen eraldaketa jasangarria bultzatzeko ekimena da, berrikuntzaren bidez funtzionatzen duena. Bere jarduera korporazioen eta berrikuntza sortzen duten erakundeen (zentro teknologikoak, unibertsitateak, etab.) arteko lankidetza proiektuen garapenean oinarritzen da, industriaren erronkak identifikatu eta ondoren ebatzita.
“Aliantza berri honekin, ezagutza eta esperientzia eskaintzen ditugu zentro teknologiko gisa, nekazaritzako elikagaien industriaren ekosistema dinamizatzeko, hura indartzeko, eta negozio aukera berriak sortzeko”, adierazi du Jesus Valero Tecnaliako zuzendari nagusiak.
ETE berritzaileentzako plataforma
TranXforma Food berrikuntza bultzatzeko proiektu bat garatzen ari da, ETEen eraldaketa jasangarria nekazaritzako elikagaien industrian sustatzeko. Ekimen berri honek enpresa txiki eta ertainen eta start-upen arteko lankidetza proiektuen garapenean lagundu nahi du, merkatu aukera berriak sortuko dituzten erronkei irtenbideak bilatuz.
Gaur egun, TranXforma Food garapen egoera aurreratuan dauden hainbat proiektutan ari da lanean, besteak beste, elikagaien kalitatea eta haien balio bizitza zaintzeko arloetan, elikadura erabilerarako termoplastiko biokonpostagarriak sortzen, edota nekazaritza ekoizpenen biomasa aprobetxatzen.