Gipuzkoak CDL-Donostia AI for Startups 2025 programaren lehen deialdia jarri du abian. Programa hori adimen artifizialeko start-up zientifiko-teknologikoak bultzatzeko diseinatu da, proiekzio globalarekin. BIC Gipuzkoak eta IESE negozio-eskolak kudeatzen dute ekimena, eta irailaren 30ean hasiko da. Mentoria estrategikoa, nazioarteko sareetarako sarbidea eta laguntza eskainiko ditu, ikerketak enpresa-proiektu eskalagarri bihurtzeko helburuarekin.
CDL Quantum nazioarteko sarean dago programa, Calgary, Toronto eta Montreal hiriekin batera, eta adimen artifizialean, lengoaia naturalaren prozesamenduan edo eredu eleaniztunetan lan egiten duten mundu osoko start-upei zuzenduta dago. Deialdia zabalik egongo da 2025eko irailaren 30eko 23:59ak arte, eta ez da beharrezkoa izango Europar Batasunean eratuta egotea parte hartzeko.
Aukeratutako enpresek programa hibrido batean parte hartzeko aukera izango dute, saio presentzial eta birtualekin, eta nazioarteko ospea duten zientzialari, ekintzaile eta inbertitzaileen laguntza izango dute, hori guztia akzio-partaidetzarik utzi beharrik gabe. “Lehen deialdi honekin, Gipuzkoak sendotu egin nahi du bere estrategia, sortzen ari diren inpaktu handiko teknologietan abangoardian jartzeko”, nabarmendu du Unai Andueza Ekonomia Sustapeneko eta Proiektu Estrategikoetako diputatuak.
Ekimena Gipuzkoa Quantum estrategiaren barruan kokatzen da, zeinaren helburua adimen artifizialaren eta konputazio kuantikoaren inguruko nazioarteko ekosistema indartzea den. Ildo beretik, urriaren 15ean IBM Quantum System Two instalatuko da IBM Euskadi Quantum Computational Centre delakoan, eta hori baliabide estrategikoa izango da teknologia kuantikoaren mugan lan egiten duten start-upentzat.