Applek data jarri dio bere urteko hitzordu nagusiari: WWDC26 ekainaren 8ko astean egingo da. Garai batean berrikuntza ukaezinaren erakusleiho zena azterketa bihurtu da multinazionalarentzat; izan ere, lehiakideekin alderatuta, atzean geratzen ari da askoren ustez.
Urteetan zehar, Apple abangoardia teknologikoaren sinonimo izan da. Hala ere, azkenaldian, merkatua txunditzeko gaitasuna agortzen ari den seinaleak pilatzen hasi da. Hala, 2000ko hamarkadaren amaierako Nokiarekin konparazioa sektoreko analisietan azaltzen hasi da: paradigma-aldaketa baten aurrean garaiz erreakzionatzen jakin ez zuen enpresa nagusia izan zen Nokia. Google eta Microsoftek adimen artifiziala (AA) beren produktu eta zerbitzuen muinean txertatu duten bitartean, Apple berandu iritsi da eta proposamen lauso batekin gainera. 2024an, konpainiak presaka aurkeztu zuen Apple Intelligence, gailuetako erabiltzaile-esperientzia iraultzea agintzen zuen AA sistema. Hala ere, ia bi urte geroago, funtzionalitate horietako asko oraindik ez dira gauzatu.
Etsipena iazko WWDC25 topaketan islatu zen, adimen artifizialean aurrerapen handiak egiteko itxaropenek errealitate askoz kontserbadoreago batekin talka egin zutenean. Iragarpen handirik ez egiteaz gain, aurreko urtean agindutako gaitasunak ere ez ziren hedatu. Geldialdiaren pertzepzioa indartzen duen sintoma da hori. Testuinguru horri, Gil Luria DA Davidson aholkularitza etxeko buruak egindako balorazioak gehitu behar zaizkio: iPhonea edo Apple Watcha bezalako produktu nagusiek ez dute funtsezko aldaketarik izan azken lau urteetan. Smartphoneen merkatuak, oro har, berrikuntzaren moteltzea jasan badu ere, beste eragile batzuek arriskatzea erabaki dute. Samsungek eta, batez ere, Txinako fabrikatzaileek, pantaila malguen, gailu-kategoria berrien, errealitate areagotuko betaurrekoen eta adimen artifizialaren integrazio askoz erasokorragoaren alde egin dute.
Ekosistema berrikuntzaren aurrean: estrategia ala etsipena?
Agertokio horretan, Applek bere abantaila lehiakor nagusia indartzearen alde egin duela dirudi: ekosistema. Gailuen eta zerbitzuen arteko integrazioa bere aktiborik handienetako bat da oraindik ere, baina zalantzak daude bide hori nahikoa ote den gero eta dinamikoagoa den merkatu bateko lidergoari eusteko.
Aldi berean, konpainia bere posizionamendua berritu ari da. Tradizioz premium segmentuarekin eta asmo handiko izaerarekin lotua egon bada ere, Applek bere katalogoa zabaldu du produktu eskuragarriagoekin. MacBook Neo edo iPhone 17e bezalako gailuek estrategia hori islatzen dute, erabiltzaile berriak bere ekosisteman sartzeko asmoz. Mugimendu horrek, ordea, kostu sinboliko bat du: badirudi Apple dagoeneko ez dela marka esklusibo bat, goraino dagoen merkatu baten barruan aukera beste kidea bat izan nahi duena baizik. Bere zorroaren dibertsifikazioak, irudia indartu beharrean, nortasuna lausotu diezaioke.
Zurrumurruek ez dute etenik. Horien artean, lehen iPhone tolesgarriaren balizko merkaturatzea nabarmentzen da
Hala eta guztiz ere, zurrumurruek ez dute etenik. Horien artean, lehen iPhone tolesgarriaren balizko iritsiera nabarmentzen da; mugimendu hori baieztatuko balitz, Apple beste fabrikatzaile batzuek urteak daramatzaten kategoria batean sartuko litzateke. Horrekin batera, Tim Cook egungo CEOaren irteeraz eta Steve Jobsek zuen "magia" hori berreskuratzeko gai den zuzendari orokoo berri baten aldeko apustuaz ere hitz egiten da.
WWDC26, beraz, funtsezko hitzordua da Appleren berrikuntza-pultsua neurtzeko. Bertan, sistema eragile berriak ikusiko ditugu, hala nola iOS 27 eta macOS 27, eta konpainiaren DNA denbora luzez definitu zuen "wow" efektu hori berreskuratzeko gai den egiaztatuko dugu. Galdera nagusia airean dago oraindik: Apple Nokiaren akatsak errepikatzen ari da, eraldaketa teknologikoko une batean atzean geratuz, ala bide kontserbadoreagoa aukeratzen ari da, lehendik funtzionatzen duen horretan konfiantza jarriz? Erantzuna datorren ekainean has liteke forma hartzen.