Bilboko portuaren digitalizazio maila areagotzeko asmoz, Bilboko Portu Agintaritzak 2025-2030 Eraldaketa Digitaleko Plana aurkeztu du gaur goizean. 18,1 milioi euroko inbertsioa egingo du, azpiegiturak modernizatzeko asmoz, eta “segurtasuna sendotu, eragiketen efizientzia handitu eta ekosistemaren logistikoaren lehiakortasuna” indartu nahi dute.
Ivan Jiménez Bilboko Portu Agintaritzako presidenteak aurkeztu du plana. “Eraldaketa digitala ez da pertsonak ordezkatzea, baizik eta gure taldeei tresna hobeak ematea, prozesuak automatizatzea eta portuaren maila teknologikoa igotzea. Gure helburua Bilboko Portua Atlantikoko Arkuaren abangoardia digitalera eramatea da”, adierazi du.
Eraldaketa digitalerako programa 17 proiektu estrategikoetan banatu dute, eta proiektu horiek sei arlotan sailkatu dituzte: azpiegitura eta konektibitatea, automatizazioa eta adimen artifiziala, segurtasuna, lanpostu digitala, informazio-sistemak eta logistika eta garraioa.
Proiektuen bidez, eragiketen denborak eta kostuak murriztu, trazabilitatea hobetu, zibersegurtasuna sendotu, logistika-plangintza optimizatu, jasangarritasunean aurrera egin eta enpresei, operadoreei eta ontzi-konpainiei zerbitzu digitalagoak eta arinagoak eskaini nahi dizkiete.
Azken urteetan, mundu osoko portuak IoT, 5G, automatizazioa, adimen artifiziala, digital twins edo trazabilitate-sistemez hornitzen ari dira, eta Bilboko Portu Agintaritzak azaldu du Bizkaiko portua munduko portu aurreratuenen pare jarriko duela plan berriak.