Azken urteotan badirudi hurrengo iraultza teknologikoa errealitate birtualaren edo errealitate areagotuaren eskutik etorriko dela. Hainbat enpresa teknologiko gero eta gehiago hurbiltzen ari dira teknologia horretara, Meta, adibidez, metabertsoarekin. Zurrumurruen arabera, datozen asteetan Applek aurkeztuko du teknologia horien inguruko ekosistema berria.
Urtebete da Facebook konpainia estatubatuarrak rebranding bat egitea eta enpresaren izena bera Metara aldatzea erabaki zuela. Horrekin batera, Mark Zuckerbergen konpainiak errealitate areagotuan oinarritutako ekosistema berria aurkeztu zuen, Metaverse izenekoa. Harrezkero, inoiz baino gehiago jarri dugu arreta errealitate areagotuan eta errealitate birtualean, eta beraz, lehiakideek antzeko teknologiak garatu dituzte, kontsumo-teknologiaren etorkizuna izango dela dirudien horretan atzean ez geratzeko. Facebook, orain Meta, joan den hamarkadan hasi zen errealitate birtualean lan egiten, zehazki, 2014an, teknologia horretarako software eta hardware espezifikoa garatzeko Oculus enpresa erosi zuenean. Oculusen errealitate birtualeko betaurrekoak erreferente bihurtu dira, eta gaur egun, errealitate horrekin elkarreragiteko dauden aukera bakarretako bat da.
Joan den hamarkadaren erdialdean, errealitate birtuala teknologian aritzen ziren enpresa guztiek izan nahi zuten aurrerapen teknologikoa zen. Oculus errealitate birtualeko betaurrekoekin jarraitu beharreko erreferente bihurtu ziren eta laster HTC, Google edo Samsung lehian sartzera animatu ziren. Samsung eta Googlen proposamenak smartphone bera errealitate birtualaren bisore gisa erabiltzera bideratuta zeuden, smarphonea errealitate birtualaren bisore bihurtzen zuten osagarriak ateraz.
Errealitate birtualaren porrota
Errealitate birtualak uste baino denbora gehiago darama gure artean. 1990eko hamarkadaren erdialdean, Nintendo konpainia japoniarrak historian arrakasta gutxienetarikoa izan duen bideo-kontsola merkaturatu zuen: Virtual Boy. Bideo-kontsola horrek irudi zuri-gorriak erreproduzitzen zituen bisore batean. Errealitate birtualeko betaurreko horiek sortzen zituzten zorabio eta ikusmen-arazoen ondorioz, bideo-kontsolak sekulako porrota izan zuen, errealitate birtuala garai horretarako prestatuta ez zegoela erakutsiz.
Azken hilabeteetan, errealitate birtualeko eta errealitate areagotuko betaurrekoen zurrumurruak gero eta pisu handiagoa hartzen ari dira Applen. Zurrumurru guztien arabera, sagar hozkatuaren konpainia bere ekosistema sortzeko lanean ari da, teknologia horren inguruan. iPod, iPhone edo iPadekin egin zuten bezala, Applek mota horretako bisoreen industria irauli nahi du, eta merezi duten protagonismoa izan dezaten lortu. Badirudi Cupertinoren konpainia teknologia hori amaitzen ari dela, eta datorren urtarrilean Appleren betaurreko desiratuak aurkeztuko direla.
Azken hilabeteetan, errealitate birtualeko eta errealitate areagotuko betaurrekoen zurrumurruak gero eta pisu handiagoa hartzen ari dira Applen. Zurrumurru guztien arabera, sagar hozkatuaren konpainia bere ekosistema sortzeko lanean ari da, teknologia honen inguruan
Informazio eta zurrumurru horiek guztiak Mark Gurmanengandik datoz, enpresatik bertatik datozen filtrazioen iturri fidagarrienetako bat. Gurmanen arabera, betaurreko horiek errealitate mistoa erabiliko lukete, hau da, errealitate areagotua eta errealitate birtuala. Apple teknologia horretan lanean ari dela adierazten diguten beste seinale batzuk bere lan-eskaintza dira. Appleren lana bilatzeko orrialde ofizialean, asko dira errealitate birtualean eta errealitate areagotuan espezializatutako ingeniarientzat eskaintzen diren lanpostuak.
Bi hilabete barru zalantzak argituko ditugu eta ikusiko dugu zurrumurruak egia bihurtzen diren eta Applek betaurrekoak eta Appleverse aurkezten dituen, Mark Gurmanek dioen bezala. Oraingoz, errealitate areagotua eta errealitate birtuala hastapenetan daude, nahiz eta teknologia horrek hainbat hamarkada eman dituen garatzen eta orain arte arrakasta gutxikoa izan den.