Eusko Jaurlaritzako Gobernu Kontseiluak onartu du Euskorpora elkarteari gehienez bost milioi euroko dirulaguntza zuzena ematea, Euskorpus proiektuaren bidez euskarazko adimen artifizialaren garapena bultzatze aldera. Proiektua ekimen publiko-pribatua da; Euskorpora irabazi asmorik gabeko elkartea 2024ko urtarrilean sortu zen, teknologia digitalei aplikatutako euskarazko hizkuntza datuak garatzeko helburuarekin.
Laguntza berria Industria, Trantsizio Energetiko eta Jasangarritasunaren Sailak eta Kultura eta Hizkuntza Politika Sailak kudeatuko dute. Halaber, Zientzia, Unibertsitate eta Berrikuntza Sailak ere parte hartuko du, hizkuntzaren teknologiako ikerketa sustatzeko. Jaurlaritzak azaldu duenez, proiektuak berrikuntzarekin eta euskararen presentzia digitalarekin duen konpromisoa berresten du.
Euskorpus proiektua hiru fasetan garatuko da: lehenik, plangintza eta definizioa egingo dira, bulego teknikoa sortuta eta corpus mota zein sektore estrategikoak zehaztuta; bigarren fasean, hizkuntza corpusak bildu eta oinarrizko kode irekiko ereduak garatuko dira; eta, azkenik, corpus horien eta eredu digitalen transferentzia eta ustiapena egingo da, erabiltzaile guztientzako irisgarritasuna bermatuta.
Jaurlaritzaren arabera, “teknologia digitalen bilakaera azkarra hizkuntza nagusiek soilik baliatzeko modukoa bada, hizkuntza gutxituak arriskuan egon daitezke”. Hori dela eta, proiektuaren bidez euskara “garapenerako funtsezko tresna” bihurtu nahi da, hizkuntza baliabide digitalen Europako sarearekin konektatuta.
Azkenik, Jaurlaritzak azpimarratu du proiektuak Aroa marko estrategikoko beharrei erantzuten diela eta Eskualdeetako eta Eremu Urriko Hizkuntzen Europako Gutunaren helburuekin bat egiten duela, euskararen etorkizuna bermatzeko tresna gisa.