Produktuan, prozesuan edo negozio-ereduan berrikuntzak bultzatu dituzten erakunde eta kasuen bila ari da Innobasque Berrikuntzaren Euskal Agentzia Global Innovation Dayen XI. ediziorako. Hain zuzen, egun horretan aurkeztuko diren kasu praktikoak hautatzeko deialdia zabaldu berri du. Araba, Gipuzkoa eta Bizkaiko askotariko erakundeak aurkeztu daitezke deialdira, izan sektore publikokoak edo pribatukoak, izan enpresa edo zentro teknologiko, izan enpresa txiki, ertain edo handia. Hala ere, industria-manufaktura, energia eta infurumena, elikadura, edo kultura eta sormen industiei lotutako egitasmoak izan beharko dira, edo teknologia zehatzei lotutakoak, hala nola IKT, nanoteknologia, energia garbiak edo material aurreratuak. Gaia honakoa izango da: ETE-ek gauzatutako berrikuntza proposamenak. Ontzat jotzen diren kasuak Innobasqueren Kasu Praktikoen Bankuan sartuko dira.
Kasu praktikoen egitasmoa duela bi edizio jarri zen martxan; alegia, aurtengoa hirugarren edizioa izango da. Innobasquek jakinarazi duenez, aurreko edizioetan 200 erakundek baino gehiagok aurkeztu dituzte euren proposamenak. Lehenengoan, krisiei aurre egiteko kudeaketak izan zituzten hizpide; bigarrenean, berriz, eraldaketa digital, jasangarri eta soziala zuten egitasmoak izan ziren protagonista.