Ba al dakigu nondik datozen gure erosketa-saskia betetzen duten produktuak? Jabetzen al gara astero sortzen dugun hondakin plastiko kopuruaz? JakiZU! tresna, CodeSyntax enpresak ACEDErekin eta Eroskirekin elkarlanean garatutakoa, gure kontsumitzeko modua eraldatzeko asmoz dator. Erosketa-tiketaren azterketa automatizatu bati esker, web-aplikazio honek erosketa bakoitzaren jasangarritasun maila zehatz-mehatz ezagutzeko aukera ematen du, gure kontsumo-ohiturak hobetzeko gomendioak eskainita.
JakiZU! ez da edozein aplikazio, kontsumo kontziente bat sustatzeko proposamen zehatza baizik. Eroskiren saltokietan egindako erosketak aztertzen ditu, edozein nabigatzailetatik erabil daitekeen web aplikazio bidez. Funtzionamendua erraza bezain berritzailea da: nahikoa da tiketari argazkia ateratzea edo dokumentua plataformara PDF formatuan igotzea. Ondoren, sistemak informazioa prozesatzen du, produktu batzuk identifikatzen ditu eta hainbat irizpidetan oinarritutako jasangarritasun-diagnostikoa sortzen du.
Aztertzen dituen datuen artean, elikagaien jatorria nabarmentzen da, tokikoak direnak bereiziz (Km0), eta ontzi motaren informazioa ere eskaintzen du. Datu horietatik abiatuta, erosketaren jasangarritasun-mailaren balorazio orokorra eskura dezake erabiltzaileak.
Tresna ez da informazioa ematera mugatzen, aholku pertsonalizatuak ere eskaintzen ditu etorkizuneko erosketak hobetzeko. Esaterako, tokiko jatorria duten edo ingurumena gehiago errespetatzen duten produktuen erosketa gomendatzen du. Amaitzean, emaitzak posta elektronikoz bidaltzeko aukera ematen du aplikazioak, erabiltzaileak txostena gorde eta kontsumo jasangarriaren bilakaera jarrai dezan.
JakiZU!ren interfazea erraza eta intuitiboa da. Ez du erregistrorik behar, ezta ezagutza teknikorik ere, eta horrek edonorentzat eskuragarri egiten du. Izan ere, bere itxura sinplearen atzean, asmo argi bat dago: datu objektiboen bidez eroslea kontzientziatzea.
JakiZU!ren helburua da normalean oharkabean pasatzen denari zifrak jartzea, kontsumitzaileei euren erabakien benetako pisua ulertzen lagunduta
Askotan ez gara ohartzen gure erabakien eraginaz. Etxera iritsi eta produktuak antolatzen ditugunean, zenbat plastiko botatzen dugun ikusten dugu. JakiZU!k eguneroko keinu hori beste begi batzuekin begiratzera gonbidatzen gaitu. Bere helburua da normalean oharkabean pasatzen denari zifrak jartzea, kontsumitzaileei euren erabakien benetako pisua ulertzen laguntzen dielarik.
Kontsumitzaile arduratsuagoen bila
Gipuzkoako Foru Aldundiaren laguntzarekin bultzatu da proiektua, erakunde publikoak aukera paregabea ikusi baitu kontsumo-ohitura iraunkorragoak sustatzeko eta tokiko produkzio-sarea indartzeko. Eroskiren aldetik, tresna bat dator bere jasangarritasun arloko helburuekin. Kooperatibaren estrategia da produktu osasungarriagoak eskaintzea, ingurumen inpaktua murriztu eta kontsumo eredu bidezkoagoa sustatuz. JakiZU!ren integrazioak, konpromiso hori indartzen du, kontsumitzaileei erabakitzeko tresna praktiko bat eskainita.
Aplikazioaren garapen teknikoa CodeSyntax enpresak egin du, soluzio digitaletan espezializatutako euskal enpresak, ACEDEren laguntzarekin. Oraingoz, Android eta iOS sistemetan ez dago aplikazio gisa erabiltzeko moduan, baina web aplikazio gisa erabil daiteke. Sortzaileak lanean ari dira beste saltoki batzuetako tiketekin bateragarritasuna lortzeko.
Aplikazioaren garapen teknikoa CodeSyntax enpresak egin du, soluzio digitaletan espezializatutako euskal enpresak
JakiZU!, azken batean, nola kontsumitzen dugun birpentsatzeko gonbidapen-tresna da. Jasangarritasuna premia den testuinguru batean, tresna horrek informazioan eta gardentasunean oinarritutako mentalitate-aldaketa bat dakar. Tiket bat eskaneatzea bezain keinu soilarekin ezagutu dezake kontsumitzaileak bere hautuen benetako inpaktua zein den.