Kuantikaren aldeko euskal apustuan beste pauso bat emango da udaostean. Izan ere, Creative Destruction Lab (CDL) izeneko erakundeak Quantumi buruz duen programa Donostian ezartzeko apustua egingo du, Europan nodo berria irekita. CDL-Donostia zentroa Tandem eraikinean kokatuko da, BIC Gipuzkoak Miramongo parke teknologikoan duen egoitzan. Programa Euskal Herrira erakartzeko ezinbestekoa izan da hainbat erakunderen arteko lankidetza, zehazki, Eusko Jaurlaritzaren, Gipuzkoako Foru Aldundiaren –BIC Gipuzkoaren bitartez–, eta IESE Business Schoolen artekoa.
CDL-Quantum programaren helburua da aholkularitza eskaintzea hasierako faseetan dauden eta eskalagarritasun potentzial handia duten kuantika esparruko konpainia zientifiko-teknologikoei. Horretarako, ikerketa zientifikoa eta pentsamolde ekintzailea uztartzen ditu, ikuspegi integrala eskainita. Programako tutoretza lanak inpaktu handiko enpresa teknologikoak sortu, zuzendu eta saldu dituzten ekintzaileek egiten dituzte. Aldi berean, mundu osoko zientzialari, ingeniari eta ekonomialari nagusien aholkularitza teknikoa ere izaten dute parte hartzaileek, baita IESE MBAko ikasleen inplikazioa ere, zuzenean enpresa garapenean laguntzeko. Halaber, mundu osoko finantzaketa ekintzaileen eskura jartzeko helburua du. Gainera, AA kuantikorako eta hizkuntza naturalaren prozesamendurako korrontea jarriko du abian CDLk Donostian.
CDLren kuantikako programa Toronton eta Montrealen ezarri dute orain arte, besteak beste, eta 170 enpresa baino gehiago babestu ditu 2017tik. Mundu osoko bost start-up kuantikoetatik bat igaro da programatik, tartean Multiverse Compunting konpainia donostiarra.