Neiker euskal zentro teknologikoak Europako lurzoruaren osasunaren jarraipena hobetzea helburu duen AI4SoilHealth proiektuan parte hartzen du. Ekimena Horizone Europe programaren barruan kokatzen da, eta Adimen Artifizialaren (AA) bitartez, helburu du lurzoruaren egoera zehatz-mehatz aztertzea eta haren bilakaera aurreikusteko sistemak garatzea.
Horretarako, Neikerrek bi ekarpen egiten ditu: batetik, Espainiako Estatuko lurzoruei buruzko datuak sistemara bidaltzen ditu; bestetik, adierazle biologiko berriak txertatzen ditu, lurzoruen funtzionamendu ekologikoa hobeto ulertzeko. “Horrek jauzi kuantitatiboa dakar aurreko tresnekin alderatuta”, nabarmendu du Lur Epelde ikertzaileak.
Sistemaren oinarrian Soil Health Data Cube izeneko azpiegitura digital berritzailea dago, zeinak lurzoruaren milaka erregistro antolatzen dituen, bai datu fisikoak, kimikoak, baita klimatikoak bateratuta.
Zentroak, halaber, teknologia horien erabilera erraztu eta merkeago egiteko lan egiten du, laborategiko azterketarik gabe osasun-diagnostikoak egiteko moduak probatuta. Gainera, nekazarien eta teknikarien iritzia jasotzen du sistemaren hobekuntzarako, eta mugikorreko aplikazioa ere prestatzen ari da erabiltzaileen beharretara egokitzeko.