Sener ingeniaritza eta teknologia taldeak eta Tekniker teknologia zentroak lankidetza hitzarmen bat sinatu dute elkarrekin zenbait sektore estrategikotan I+G bultzatzeko, hala nola, hidrogeno berdean edo industriaren digitalizazioan.
Ohar bidez azaldu dutenez, akordioaren sinadurak sendotu egin du bi erakundeek energia berriztagarriekin lotutako hainbat proiekturen bidez historikoki izan duten harremana. Hitzarmen horri esker, Teknikerrek ezagutza eta esperientzia emango dizkio Senerri, hidrogeno berdearekin edo digitalizazioarekin hainbat ikerketa ildotan aurrera egiteko, interes handieneko eremutzat hartuta.
Bestalde, offshore eolikorako teknologiak, energia hibridoen eta berriztagarrien planten kudeaketa, mugikortasun iraunkorra eta hiri adimendunak, sistema mekatronikoen eredu digitalen sorrera, eta gailu medikoak homologatzeko metodologiak eta prozedurak bateratzea dira landu nahi dituzten beste eremuetako batzuk.
Modu kooperatiboan lan egingo dute talentu ikertzailearen garapenean eta transferentzian, Senerrek langile espezializatuei dagokienez dituen behar eta eskaera nagusiei erantzungo dieten trebakuntza programen bitartez.