Tim Cookek astelehenean, abuztuaren 31n, utzi zuen hamabost urtez betetako CEO kargua, agintea John Ternus Hardware Ingeniaritzako presidenteorde seniorrari emanez. Aitzitik, Cookek Applen jarraituko du, presidente exekutibo gisa.
2011ko abuztuan, Tim Cook Applen zuzendaritzara iritsi zenean, Steve Jobsen itzalak eta berrikuntza-kulturak markatutako konpainia heredatu zuen. Sortzaileak industria eraldatu zuen iPod, iPhone eta iPad produktuekin. Cook desberdina zen: ez zen produktu-ameslaria, 1998an Applera iritsitako eragiketen arloko aditua baizik.
Hamabost urte geroago, ezinezkoa da egungo Apple ulertzea Cooken erabakirik gabe. Jobsen arimak bere horretan jarraitzen badu ere, Apple aparteko dimentsioko enpresa-makineria bihurtu da. Datuek argi laburbiltzen dute Cooken etapa Applen: burtsa-kapitalizazioa 350.000 milioi dolarretik 4 bilioira igaro da 2011tik, eta diru-sarrerak 108.000 milioitik 416.000 milioira igo ziren 2025ean.
Ekosistema gero eta handiagoa
Cooken aroan, Applek bere produktuen katalogoa zabaldu zuen: urtean iPhone bakarra izatetik, tamaina, prestazio eta prezio askotariko familia bat izatera igaro da. Halaber, etapa horretan ikusi dugu Apple Watch eta AirPods bezalako gailu arrakastatsuen kopurua nola handitu den.
Tim Cookek azken urteotako apustua, baina, Apple Music, Apple Pay eta Apple TV bezalako zerbitzuen alde egitea izan da. Helburua erabiltzaile gehiagorengana iristea eta ekosisteman geratzea zen. Integrazio horrek ekosistema bat sortu du, uztea zaila dena: iPhone bat erosteak AirPods edo Apple Watch bat erostera eraman zaitzake, eta zerbitzuek erakargarriago egiten dute hurrengo produktua eskuratzea. Cooken beste mugimendu handi bat Apple Silicon izan da. Inteletik M familiaren berezko txipetarako trantsizioak konpainiaren ordenagailuak eraldatu ditu, eta Applek bere teknologiaren gainean duen kontrola indartu du. Horri esker, Mac ordenagailuak berriro bihurtu dira lehiakor merkatuan.
Kontserbadoreegia izatea aurpegiratu zaio Cookie Jobsekin alderatuta. Apple Watch eta AirPods alde batera uzten badira, Applek ez du lortu azken hamabost urteotan iPod, iPhone edo iPad bezalako kategoria bat birdefinitu duen gailu berririk abiaraztea
Balantzea, ordea, ez dago kritiketatik libre. Kontserbadoreegia izatea aurpegiratu zaio Cookie Jobsekin alderatuta. Apple Watch eta AirPodsak alde batera uzten badira, Applek ez du lortu azken hamabost urteotan iPod, iPhone edo iPad bezalako kategoria bat birdefinitu duen gailu berririk abiaraztea. Apple Vision Prorekin izaera hori berreskuratzen saiatu zen, baina bisoreak ez du espero zen arrakasta lortu. Adimen Artifiziala da beste erronka handia. Applek errealitate areagotuan indarrak biltzen zituen bitartean, industria bete-betean sartu zen Adimen Artifizialaren iraultzan. Google, Microsoft, OpenAI eta Anthropic azkar aurreratu ziren, Apple atzean geratzen zen bitartean.
John Ternus, konpainiaren etorkizuna
Orain John Ternusen txanda da. Ez da hain ezaguna, nahiz eta Applen izan den 2001az geroztik. Duela bost urte Hardware Ingeniaritzako presidenteorde senior izendatu zuten. Produktuen garapenetik dator, eragiketen sektoretik zetorren Cooken aldean.
Ternusek jasotzen duen konpainia Cookek 2011n aurkitu zuena baino askoz sendoagoa da, baina beste erronka batzuei aurre egin behar die. CEO berriak berrikuntza bultzatu beharko du, lidergo teknologikoa berreskuratu eta AA produktuen ekosisteman behar bezala integratu. Bere esperientziak produktuari eta berrikuntzari bideratutako aro berri bat erraztuko luke. Datorren irailaren 9an Apple Event berria egingo du bere iPhone eta beste gailu berriekin, Ternusen lehen erakusleiho handia izango da.
CEO berriak berrikuntza bultzatu beharko du, lidergo teknologikoa berreskuratu eta AA produktuen ekosisteman behar bezala integratu
Tim Cookek duela hamabost urte jaso zuena baino enpresa askoz handiago, errentagarriago eta dibertsifikatuagoa bihurtu du Apple. Oinordetzan jasotako ikuspegia negozio global bihurtu eta bere diru-sarrerak biderkatu zituen kudeatzaile baten ondarea da. Ternusek, beraz, makineria osoa du eskura. Bere erronka izango da erakustea Applek berriro harrapa gaitzakeela, Cooken garaian eraikitako enpresa-sendotasunari uko egin gabe. Lortzen badu, konpainiak etapa berri bati ekin diezaioke, non hazkundea eta berrikuntza erritmo berean ibiliko diren.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta