Arabako Merkataritza, Industria eta Zerbitzu Ganberak eta Vital Fundazioak enpresa ekimenak sustatzeko 25.000 euroko laguntzen hitzarmena sinatu berri dute, ‘Ekinean eta Sendotzen’ programaren baitan.
Alde batetik, ‘Ekinean’ programak dirulaguntza eskaintzen die hamar enpresa proiektu berriri, bai eta Arabako Ganberako Enpresak Sortzeko Arloaren aholkularitza eta jarraipen programa indibidualizatu baterako sarbidea ere, Araban enpresa proiektu bat garatzen ari diren eta oraindik jarduera hasi ez duten ekintzaileei.
Laguntza horiek jasotzeko baldintzen artean leudeke, eskabidea aurkezteko unean Jarduera Ekonomikoen gaineko Zergan alta emanda ez egotea, enpresa berriaren egoitza Araban izatea, eta enpresa jarduera, programan onartua izan denetik, hilabeteko epean hastea.
‘Sendotzen’ atalaren baitan, berriz, sortu berri diren hamar enpresa ingururi ere dirulaguntza eskainiko zaie, eta horiek ere Arabako Ganberaren aholkularitza eta jarraipenerako banakako programarako sarbidea izango dute. Kolektibo onuradunak enpresa sortu berriak dira, beren enpresa-proiektua sendotzeko fasean daudenak, eskaera aurkezteko unean Jarduera Ekonomikoen gaineko Zergan hasierako alta eman zenetik hiru urte baino gehiago igaro ez direnak edo oraindik enpresa-jarduera abiarazteko fasean daudenak, enpresa berriaren egoitza soziala eta fiskala Araban dutenak, zerga-betebeharrak eta Gizarte Segurantzarekikoak egunean dituztenak, mikroenpresa bat direnak (gehienez 10 langile), enpresa proiektuaren garapenean zuzenean inplikatuta dauden pertsona fisikoen partaidetza dutenak gehienak, eta enpresa proiektua sendotzeko fasean daudenak.
Bi programetarako eskabideak aurkezteko epea 2023ko ekainaren 2ra arte egongo da zabalik Arabako Ganberaren web atarian.
Ganberak jakitera eman duenez, 300 ekintzaile baino gehiagori laguntzen die urtero euren enpresa proiektua garatzeko, Vital Fundazioaren laguntzarekin. Fundazio horrek guztira 20 poltsa ekonomiko ematen dizkie hautatutako proiektuei, bakoitza 1.250 eurokoa.