Eusko Jaurlaritzak, HAZIren bitartez, kanpaina bat jarri du abian Enkarterriko eskualdean hazkunde ekonomikoa eta enpleguaren sorrera bultzatuko duten proiektuak erakartzeko eta hautatzeko. Ekimena bioekonomian oinarritutako negozioa edo ideia duten startupei eta ekintzaileei zuzenduta dago, eta, aukeratuz gero, Gueñesko Enpresa eta Berrikuntza Zentroaren proiektuen inkubagailuan parte hartuko dute.
Eusko Jaurlaritzak jakinarazi duenez, Enkarterri 2030 Eskualdeko Plan Estrategikoaren barruan dago ekimena, eta proiektu berritzaileak sortu nahi ditu hiru esparrutan: nekazaritzako elikagaien katean, baso-katean eta ekonomia zirkularrean.
Jaurlaritzak zehaztu duenez, helburua baliabide naturalak eragile ekonomiko gisa balioestea da, lehen sektore oso espezializatua eta lurraldearen erdia baino gehiago hartzen duen zuhaitz azalera duen eremu batean. Horregatik, adierazi duenez, eskualde hori "aukera bat da Euskal autonomia Erkidegoak bioekonomiaren alde egiten duen apustua indartzeko eta berrikuntzaren eta teknologiaren bidez bere baliabideei balio erantsi handiagoa emateko".
Ekimen lehiaketa honek 1.500.000 euroko aurrekontua du, enpresa-ideia eta -proiekturik onenak saritzeko, eta laguntza eta zerbitzu espezializatuak eskainiko ditu ekintzailetza prozesu osoan zehar, ideia inkubatzen denetik produktua edo zerbitzua merkaturatzen den arte.
Hala, hautatutakoek sareko lana, proiektuan zehar tutoretza, prestakuntza-plana, baldintza ekonomiko onuragarriak eta Eusko Jaurlaritzako Nekazaritza, Arrantza eta Elikadura Politikako Sailburuordetzak dituen laguntzak (Bioeconomía, Lehiatu, Leader, Erein, etab.) jasoko dituzte.
Ekimen lehiaketan parte hartu nahi duten enpresek edo pertsona juridikoek 45 eguneko epea izango dute eskabideak aurkezteko HAZIren web orriaren bidez. Ez dago lurralde mugarik hautagaitza aurkeztu ahal izateko, baina ezinbesteko baldintza da proiektua Enkarterrin garatzea.
Industria-dibertsifikazioan edo prozesuen hobekuntzan interesa duten enpresei irekita dago ekimena, baita Lanbide Heziketako gradu bat, doktorego bat, master bat edo unibertsitateko azken maila egin eta ideia berriak proposatu nahi dituzten pertsonei ere.
Proiektuen gaiei dagokienez, 2024ko Euskadiko Ekonomia Zirkularraren eta Bioekonomiaren Planean jasotako ildoetako batean kokatuta egon beharko du: negozio-eredu zirkular berrietan, berrikuntza eta teknologian, material iraunkorretan, ekodiseinuan, baliabideen ustiapen iraunkorrean, elikagaien xahutzean, edota hondakinen edo bigarren mailako lehengaien kudeaketan.
Adituen batzorde bat arduratuko da proposamenak baloratzeaz, zehaztutako irizpide batzuen arabera, eta abian jartzeko ekimen berritzaileenak aukeratzeaz. Ondoren, Gueñesko Bioekonomiako Enpresa eta Berrikuntza Zentroan sartuko dira. Zentro horretan, laguntza eta zerbitzu espezializatuak eskainiko dira, helburu bikoitzarekin: proiektuaren inkubazioa hasierako etapetan (garapena eta hazkundea) eta azelerazioa ondorengo faseetan (ahalik eta denbora laburrenean negozio eredu errentagarri eta errepikagarriak lortzea).