Autoen matrikulazioek gora egin dute bigarren hilabetez jarraian. Fabrikatzaileen patronalak (Anfac), kontzesionarioek (Faconauto) eta ibilgailu-saltzaileek (Ganvam) adierazitako datuen arabera, ibilgailu berrien salmentak %12,7 igo dira irailean 2021eko hil beraren aldean, orotara, 67.240 ibilgailu saldu dira. Hala ere, merkatuak aurreko ekitaldian baino %7,4 beherago jarraitzen du, 600.000 unitateen muga ozta-ozta gaindituz.
Hileko alderdirik positiboenetako bat da salmenta-bide guztiek zenbaki positiboak erregistratu dituztela. Enpresakoa izan da hazkunderik handiena izan duena, %19,2, 30.600 unitate banatu baitira, partikularren kanala baino pixka bat gehiago, azken hori %6 baino ez baitzen igo. Bestalde, alokatzaileena, mikrotxipen krisiak gehien kaltetu duena, %17,8 igo da, 5.300 unitate pasatxoraino.
Abuztuko salmenten joera positiboaren ondotik (%9,1 igo ziren) etorri da iraileko datu ona. Hala ere, fabrikazioaren geldialdiak hainbat lantegitan itzuli dira uda amaitu ondoren. Ildo horretan, txipen krisia gogortu izanaren erakusgarri da Seat Martorellen (Bartzelona) abendura arte aldi baterako lan-erregulazioa onartu izana.
"Bigarren hilabetez jarraian, beheranzko merkatu-testuinguruan eta egoera sozioekonomiko oso txarrean, salmentak igo egin dira. Sektoreak krisi larrian jarraitzen du, ekoizpenerako materiala falta delako”, adierazi du Anfacek ohar batean.
Bestalde, ohartarazi dute matrikulazioek gora egin duten arren, eskariak behera egin duela. "Eskaria nabarmen ahuldu da, ekonomiaren eta kontsumoaren egoera txarra delako. Azken hiruhileko honetan, eroslearen konfiantza falta orokorraz gain, interes-tasen gorakadak eroslea atzera bota dezake ibilgailu bat erosterako garaian. Ondorioz, ibilgailu berria Espainiako familien aukeretatik urruntzen ari da", azaldu du kezkaz Faconautok.