Automobilgintzaren sektorearentzat aste garrantzitsua izaten ari da. Ostiralean bilera gakoa izango dute Von der Leyenek eta Europako automobilgintzaren industriak, sektorearen etorkizunerako mugarri izango diren erabakiak hartuko baitituzte.
Testuinguru horretan, EAEko industriaren ordezkaritzak bidaia egin du Munichera, eta, bertan, Eskualde Automotrizen Aliantzak (ARA) sustatutako Municheko Adierazpena sinatu du. Dokumentu horrek Europako Batzordeari eskatzen dio manten dezala automobilgintza “lehiakortasunaren eta ongizatearen zutabe gisa”. Eusko Jaurlaritzako, Basque Trade & Investmenteko eta ACICAE klusterreko arduradunek osatutako euskal ordezkaritzak mugikortasun jasangarrirako trantsizio justuaren beharra defendatu du, sektoreak Europako automobilgintzako 30 milioi langileren zati handi bat enplegatzen dutela gogoratuta.
Mikel Jauregi Industria sailburuak EAEko industriaren garrantzia azpimarratu zuen eta datozen urteetarako lehentasunak finkatu zituen: finantzaketa, inbertsioa berrikuntzan eta sektoreko eskari berria sortzea. Horrez gain, deskarbonizazioaren aldeko apustu sendoa azpimarratu zuen sailburuak, neutraltasun teknologikotik abiatuta, “inor atzean utzi gabe mugikortasun iraunkorrago baterantz aurrera egitea ahalbidetzen duen estrategia” defendatuta.
Adibide gisa, Emisio Gutxiago programaren emaitzak aurkeztu zituen Jauregik, zeinaren bidez matrikulazioak %30 inguru igo diren EAEn (2024ko datuekin alderatuta). Planak izan duen harrera ona dela eta, Eusko Jaurlaritzak urriaren 15era arte luzatuko du eskaerak egiteko epea, aurreikusitakoa baino hilabete bat gehiago. Jauregik esan zuen eredu hori beste lurralde batzuetara esportatu daitekeela, automobil-parkearen berrikuntza sustatzen duelako, emisioak murrizten dituelako eta ekonomia dinamizatzen duelako.
Municheko Batzarrean, hitzarmena sinatu zuten eskualdeek finantzaketa handiagoa, erregulazio-malgutasuna eta parte-hartze handiagoa eskatu zuten Automotive Action Planean eta Elkarrizketa Estrategikoan. 2028-2034 Urte Anitzeko Finantza Esparruaren barruan bidezko trantsiziorako programa bat martxan jartzea ere planteatu zuten. Gainera, EAEko ordezkaritzak aldebiko bilerak izan zituen Bavariako eta Frantziako eskualde horretako ordezkariekin, Europako automobilgintzaren defentsan ahaleginak koordinatzeko.