Hego Euskal Herrian, 36.864 etxetara iritsi dira 2026ko urrian Bizitzeko Gutxieneko Diru-sarrerak (BGDS), Gizarte Segurantzako Institutu Nazionalaren (INSS) datuen arabera. Horietan, guztira, 102.297 pertsona bizi dira: 71.772 Araban, Bizkaian eta Gipuzkoan, eta 30.525 Nafarroan.
Laguntza jasotzen duten etxeen kopuruak bilakaera desberdina izan du bi lurraldeetan. EAEn, iazko urriaren aldean, 1.043 etxek utzi diote prestazioa jasotzeari; Nafarroan, aldiz, 782 etxe gehiagok jasotzen dute laguntza.
Prestazioaren batez besteko zenbatekoari dagokionez, kontrako joerak izan dira. EAEn, etxe bakoitzak 667,66 euro jaso ditu batez beste, iazko urrian baino 62,61 euro gehiago. Nafarroan, berriz, batez bestekoa 507,38 eurokoa izan da, aurreko urteko epe berean baino 161,46 euro gutxiago.
Laguntzaren titularrei erreparatuta, emakumeak dira gehiengoa bi lurralde-eremuetan: EAEn, 27.525 titularretatik 17.004 emakumeak dira; Nafarroan, berriz, 9.339 titularretatik 5.525. Nazionalitateari dagokionez ere, bertako herritarrak dira gehienak, 19.629 EAEn eta 6.269 Nafarroan. Titularren batez besteko adina 47,72 urtekoa da EAEn, eta 47,01 urtekoa Nafarroan.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta