Bizkaiak eta, oro har, Euskal Autonomia Erkidegoak, aurrerapauso nabarmena egin dute jabetza industrialaren arloan, Babestu 2025 azterketaren arabera. Barrixe Bizkaiko Berrikuntza Behatokiak egindako txostenak erakusten du Europako patente-eskaerek gora egiten jarraitzen dutela: Bizkaiak 71 eskaera erregistratu ditu 2024an, eta EAEk 193, bi kasuetan serie historikoko kopururik altuena lortuz. Joera hori 2018tik ikusten den hazkunde progresiboaren parte da, pandemiak eragindako eten laburraren ondoren.
Aitzitik, patente nazionalen jarduerak behera egin du nabarmen, bai Bizkaian, bai EAEn; “Jaitsiera hori babes-estrategia aldatzearen ondorio da, eta Europako bideari ematen dio lehentasuna” azaldu dute. Hain zuzen ere, Europako patenteak hedatzen ari dira: “2025az geroztik estatu-jatorriko Europako Patenteak %82 hazi dira Bizkaian eta %85,5 EAEn”. Enpresa-sarearen nazioartekotze gero eta handiagoaren ondorio dira gorakada horiek. Lurraldeko konpainiek gero eta gehiago baloratzen dute Europako babesak eskaintzen duen lurralde-estaldura zabalagoa eta kalitate handiko azterketa-prozesua.
Patenteen eskatzaileei dagokienez, Europako patenteen %90 baino gehiago enpresek sinatzen dituzte, eta horrek sendotu egiten du haien posizioa nazioarteko negozioetan. “Babes industrialak eragin positiboa du eta inbertsioak erakartzen laguntzen du”, nabarmentzen du EUIPO Europar Batasuneko Jabetza Intelektualaren Bulegoaren azken txostenak.
Bestalde, azterketak eskatzaile nagusiak ere identifikatu ditu: Siemens Gamesa eta Tecnalia dira Europako patenteetan agertzen diren eragile nagusien artean, eta EHUk sei eskaera egin ditu patente nazionaletan.
Azkenik, Babestu txostenak adierazten du Bizkaiak eta EAEk emakida gehien lortzen dituzten eremuak ingeniaritza zibila eta ingeniaritza mekanikoa dira, eta Bizkaiak mantentzen du pisurik handiena industria-jabetzaren gehiengo adierazleetan. Txostenaren egileek azpimarratu dute babes industrialak “erresilientzia handia erakusten duela ziurgabetasun garaian”, eta enpresen lehiakortasuna sendotzeko tresna estrategiko izaten jarraitzen duela