Talentuaren kudeaketa hizpide izango da Bizkaia with the talent izeneko topaketan. Ekainaren 17an antolatu du jardunaldia Bizkaiko Foru Aldundiak, Bilbao Exhibition Centren (BEC), non enpresak zein profesionalak bilduko diren.
Goizean zehar, nazioarteko konpainiek erakutsiko dute talentua nola kudeatzen duten, baina tokiko kasu arrakastatsuak erakutsiko dira. Hala, Sergio Ezama Netflixeko Giza Baliabideen zuzendari globalak plataformaren “antolaketa-kulturari” buruz hitz egingo du, eta Devol enpresa teknologikoko Jesús Sevillanok eta Felipe Rebollok talentua integratzeko duten eredua partekatuko dute, elkarrizketa baten bitartez. Mahai ingurua ere izango da, “Pertsonak kudeatzeko ibilbide-orria” izenekoa, eta bertan parte hartuko dute Andrea Martínezek (Mairuko Giza Baliabideen arduraduna), Leire Jordánek (Einnek-eko bazkidea eta pertsona nahiz sistemen zuzendaria) eta Zuriñe Larraurik (Zunibalgo pertsonen zuzendaria)
Bizkaiko Foru Aldundiak helburu du STEM (zientzia, teknologia, ingeniaritza eta matematika) talentuaren arloan dagoen arrakala murriztea. Bizkaia with the talent foru estrategiaren barruan kokatzen da topaketa, eta gaur da izena emateko azken eguna.