• EKONOMIA
  • EAEko defizit publikoa BPGren %3,6ra igo zen 2023an

EAEko defizit publikoa BPGren %3,6ra igo zen 2023an

EAEko administrazioek 203 milioiko defizita izan zuten

Enplegu ez-finantzarioak %7,1 handitu ziren | Argazkia: Irekia
Enplegu ez-finantzarioak %7,1 handitu ziren | Argazkia: Irekia
2025eko uztailaren 30a - 11:13

Euskal Autonomia Erkidegoko administrazio publikoek (Euskal Administrazioak, Estatuko Administrazio lurralderatuak eta Gizarte Segurantza lurralderatuak) 3.337 milioi euroko defizita izan zuten 2023an, aurreko urtean baino 365 milioi gehiago. Horrek Barne Produktu Gordinaren %3,6ko defizita ekarri zuen, aurreko urtearekin alderatuta bi hamarren gehiago. Eustatek jakinarazi duenez, hazkunde hori baliabide ez-finantzarioen igoeraz eta enpleguen areagotzeaz markatuta etorri zen.

 

Baliabide ez-finantzarioak %6,7 hazi ziren, 34.878 milioi eurora iritsita. Iturri nagusiak gizarte-kotizazioak izan ziren (11.214 milioi euro, %8ko igoerarekin), eta errenta ondare zergak ere nabarmen handitu ziren (%10,8ko igoera). Aitzitik, BEZ eta ondasun eskualdaketen jaitsierak produkzioaren eta inportazioen gaineko zergen apaltzea ekarri zuten.

Enplegu ez-finantzarioak %7,1 handitu ziren eta 38.214 milioi eurora iritsi ziren. Gizarte prestazioek izan zuten pisurik handiena (15.604 milioi, %9,2ko igoera), eta inbertsio publikoak ere nabarmen hazi ziren (%41 gehiago, 2.738 milioi eurora iritsi zen). Dirulaguntzek, ordea, beherakada azpimarragarria izan zuten (-%32,3), batik bat energiaren prezioaren hobarira bideratutako gastuaren jaitsierak eraginda.

 

Hala, EAEko administrazioek, zehazki, 203 milioiko defizita izan zuten 2023an, aurreko urteko 465 milioiko superabitaren aldean. Eusko Jaurlaritzaren saldo negatiboa 106 milioikoa izan zen, eta Bizkaiko zein Gipuzkoako erakundeek ere behera egin zuten. Aldiz, Administrazio Lurralderatuak hobera egin zuen, 245 miloi euroko superabita lortu baitzuen. Gizarte Segurantzak, berriz, defizita handitu zuen eta 2.279 milioira iritsi zen.

Azkenik, inbertsio publikoaren pisua nabarmen handitu zen Barne Eskari Publikoaren barruan: %11,4tik %14,7ra igaro zen. Inbertsioen %95 EAEko administrazioen esku egon zen, hots, 2.608 milioi euro.