Euskal Autonomia Erkidegoko industriak %23ko pisua izan zuen lurraldeko ekonomian 2024an, balio erantsi gordinaren arabera. Hala, Eustatek argitaratutako EAEko industriaren panorama 2026 txostenak jasotzen duenez, industriaren pisua EAEn handiagoa izan zen Alemanian (%20,9), Europar Batasunean (%17,2), Espainian (%14,3) eta Frantzian (%12,1) baino.
Enpleguari dagokionez, 2024. urtean sektoreak 209.459 langile zituen, eta EAEko enplegu osoaren %19,8 biltzen zuen. Kasu horretan ere, proportzioa Espainiako batezbestekoaren (%11,4) eta EB-27koaren (%15,3) gainetik zegoen. Haatik, langileen erdia baino gehiago hiru jarduera-adarretan pilatu ziren: metalurgian eta produktu metalikoen ekoizpenean (%32,5), makineria eta ekipoen fabrikazioan (%11,3) eta garraio-materialaren fabrikazioan (%9,8).
Hala eta guztiz ere, industriaren merkataritza-bilakaera ez zen berdina izan lurralde guztietan. Manufaktura- eta erauzketa-industriaren salmentak %1 murriztu ziren 2024an EAEn, baina Gipuzkoan %1,2ko igoera izan zuten; aldiz, Bizkaian %0,2 jaitsi ziren, eta Araban, %5,2. Balio erantsi gordina, berriz, %1 hazi zen sektore osoan, batez ere Gipuzkoan izandako %3,2ko igoeraren ondorioz. Era berean, manufaktura-industriako inbertsio garbia 2.245,8 milioi eurora iritsi zen, aurreko urtean baino %9,5 gehiago.
Kanpo-merkataritzan, industria-ondasunen esportazioek 31.262 milioi euroko balioa izan zuten, eta inportazioek, 27.341 milioikoa. Horrenbestez, 3.921 milioi euroko superabita izan zuen sektoreak. Produktibitatea (Eustatek manufaktura-industriako langile bakoitzeko sortutako balio erantsia kalkulatzen du) 79.700 eurokoa izan zen, Espainiakoa baino handiagoa (74.200 euro), baina Frantziakoa (90.500 euro) eta Alemaniakoa (96.400 euro) baino txikiagoa.
Berrikuntzari eta teknologiari dagokienez, industriak EAEn berrikuntza-jardueretara bideratutako gastu osoaren %38,3 bildu zuen 2024an. Hala ere, industria-jardueren %6,5ek soilik zuten maila teknologiko handia. Enpresen digitalizazioan, hamar langile edo gehiagoko industria-establezimenduen %46,4k erosketak edo salmentak egiten zituzten Internet bidez; %43,8k erosketa digitalak egiten zituzten, eta %18,6k salmenta digitalak.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta