2025aren amaieran, Euskal Autonomia Erkidegoko soldatapeko langileen %63,8k eguneratuta zuen bere lan hitzarmena, %31,7k luzapen egoeran zuen akordioa eta %4,5ek iraungita. Lan Harremanen Kontseiluak 2025eko urria eta abendua bitarteko egoera soziolaborala biltzen duen txostena aurkeztu du gaur. Bertan ondorioztatu du urtearen amaieran hitzarmenak eguneratuta dituzte langileen ehunekoa aurreko ekitaldikoa baino txikiagoa izanda ere, egoera “azken urteetako onenetakoa” dela, langileen “ehuneko handi batek” baititu hitzarmenak indarrean.
Txostenak dio 2025ean adostutako soldata igoera %3,32koa izan zela Araban, Bizkaian eta Gipuzkoan. Halaber, %3,21ko soldata igoera izan zen erkidegoan negoziatutako hitzarmenetan, Espainiako Estatuan negoziatutako hitzarmenetan (%3,57) baino igoera txikiagoa.
Indarrean dauden hitzarmenetan, lanaldiaren iraupena 1.700 ordukoa izan zen. Euskal Autonomia Erkidegoan eragina duten Espainiako Estatuan itundutako hitzarmenen lanaldia 1.718 ordukoa izan zen, EAEn negoziatutakoak, aldiz, 1.693 ordu.
2025eko urrira arte, greben ondorioz lan egin gabeko lanaldien kopurua %48,41 hazi zen, 2024aren aldean. Baina, galdutako lanaldi guztien %78 sektore-mailako gatazka bakar baten ondorio izan ziren: unibertsitatez kanpoko irakaskuntzak publikoarena.
Horrekin batera, enplegu erregulazio espedienteek kaltetutako langileen kopurua murriztu egin zen iaz. Aitzitik, lan harremana amaitzeko espedienteek gora egin zuten (%28,23).