INEk emandako datuen arabera, 3.297 hipoteka sinatu dira ekainean Hego Euskal Herrian. Horietatik 1.436 Araban, Bizkaian eta Gipuzkoan izan dira, iazko epe berean baino %23,3 gutxiago. Nafarroan, aldiz, gora egin du kopuruak, iazko hilabete berean baino %5,2 handitu baita (425 hipoteka). Halaber, Espainiako estatuan batez beste %5,54 murriztu da ekainean izenpetutako hipoteka kopurua.
Aurreko hilabetearekin alderatuz gero, EAEn %15,7 hipoteka gutxiago egin dira, Nafarroan, aldiz, %18,7 gehiago.
Guztira, 273,19 milioi euro mailegatu dira Hego Euskal Herriko ia 3.300 hipoteka horiek sinatzeko. 218,19 milioi Araban, Bizkaian eta Gipuzkoan, iaz baino %32,97 gutxiago, eta 55 milioi Nafarroan (%2,5) gehiago.
Hipotekaren batez besteko balioa 129.440 eurokoa izan da Nafarroan, iazko ekainean baino %2,6 txikiagoa. Espainian, oro har, batez besteko balioa 146.117 eurokoa izan da, iaz baino %1,9 handiagoa.