Arabako Foru Aldundiak Nexum izeneko ekintzaile zentro berria zabaldu du. Zentroa Gasteizko unibertsitate campusean egongo da, eta espazioa partekatuko du Hibridalab Arabako Berrikuntza Ireki eta Transferentzia Sortzaileko Zentroarekin.
Zentroaren inaugurazio ekitaldian izan dira gaur Ramiro González Arabako diputatu nagusia, Saray Zárate Ekonomiaren Garapen eta Jasangarritasuneko foru diputatua eta Maitane López de Foronda Nexum taldeko ordezkaria. Hiruek azpimarra jarri nahi izan dute lurraldeko ekintzailetza ekosistema indartzearen ideian, lankidetzarako eremu berriak sortuta.
Nexum “komunitate ekintzaile eta enpresarial osoarentzako gune irekia da, lurraldeko ekintzailetza-politiken lotura komuna izango da, eta ekosistemako eragile guztien eskutik lan egingo du”, adierazi du Gonzalezek. Era berean, ekintzailetzak Arabako garapen ekonomiko eta sozialean duen eginkizun nagusia defendatu du. “Arabak ekintzailetza behar du, ekintzaileak behar ditu, enpresaburuak behar ditu. Ez dago gizarte oparo eta demokratikorik enpresarik eta enpresariorik gabe”.
Horrekin batera, diputatu nagusiak legegintzaldi honetan ekintzailetzari emandako laguntza indartzeko egindako ahalegina nabarmendu du. Egindako hobekuntzen artean, honako bi hauek aipatu ditu: gehieneko dirulaguntza 80.000 eurora igotzea inpaktu handiko proiektuetarako eta gazteek, emakumeek edo landa-eremuan kokatutakoek gidatutako egitasmoetarako laguntza indartzea.