Eustaten arabera, Araba, Bizkaia eta Gipuzkoako esportazioak (2.814 milioi euro) %0,7 jaitsi dira urrian, iazko epe berarekin alderatuz gero. Energia produktuek eragin dute batik bat beherakada, %35,4 jaitsi baitira urtetik urtera. Gainerako produktuen esportazioak, aldiz, %2,5 egin dute gora.
Inportazioek (2.229 milioi euro), %12,6ko beherakada izan dute epe berean. %25 apaldu dira energia produktuak eta %7,6 gainerakoak. Hala, urriko merkataritza saldoa positiboa izan da, 584,7 milioi eurokoa, hain zuzen.
Lurraldeka, esportazioetan beherakada izan duena Bizkaia izan da soilik. %8,2 egin dute behera kanpo merkataritzak urte arteko tasan. Araban, aldiz, %7,8 egin du gora eta Gipuzkoan %0,5.
Halaber, EAEko esportazio gehienak (%51,2) bost herrialdetara egin dira: Alemania, Frantzia, Belgika, Estatu Batuak eta Erresuma Batua. Guztizko esportazioetatik %64,2 Europako Batasuneko herrialdetara egin dira.