Eusko Jaurlaritzaren Prospekzio Kabineteak EAEko 89. Soziometroaren emaitzak argitara eman ditu gaur goizean, eta horren arabera, biztanleen %60ren kezka sozial nagusia etxebizitza da. %3 egin du gora martxoan argitaratutako azken ediziotik, orduan %57k aipatzen baitzuen larritasun gisa. Kabinetetik adierazi dutenez, gainera, orain arteko erregistroak gainditu ditu, hurrengo alderdia 20 puntu behetik baitago.
Zehazki, lan merkatuarekiko kezka adierazi du %40k, eta osasungintza %24k, eta biek ala biek egin dute behera martxotik. Arazo ekonomikoei buruzko kezkek ere behera egin dute, %13k aipatu baititu.
Aitzitik, badira gora egin dutenak ere: %21ek segurtasun falta azpimarratu du kezka gisa eta immigrazioa %15ek. Kasu honetan, faktore ideologikoez ere hitz egitea garrantzitsua da. Eskuinarekin identifikatzen direnen kasuan, bikoiztu egin da immigrazioarekiko kezka; euren burua ezkertiartzat dutenek, aldiz, maizago aipatu dute etxebizitzarekiko kezka.
Egunerokoan eragiten duten arazo pertsonalen artean gehien atera direnak dira arazo ekonomikoak (%24k nabarmendua), lan merkatuari loturikoak (%23k aipatua), etxebizitza (%21en kezka) eta osasungintza (%21ena). Azken bi horiek gora egin dute martxotik, baita segurtasun faltak ere, %13k aipatu dutena.
Soziometroaren abiapuntua telefono bitartezko 3.485 inkesta izan dira, maiatzaren 20tik 26ra eginikoak, horietatik 800 Araban, 1.485 Bizkaian eta 1.200 Gipuzkoan.