Alokairuko etxebizitzen prezioa %1,6 igo da 2022ko hirugarren hiruhilekoan Euskal Autonomia Erkidegoan, eta alokairuko metro koadro bakoitzaren prezioa hileko 12,6 euroan kokatu da, inoizko preziorik altuenean. Urte arteko tasari begiratuz gero, prezioa %3,6 igo da, Idealistak argitaratutako azken txostenaren arabera.
Azken hiru hilabeteetan, alokairuko etxebizitzen hileko errentek goranzko joera izan dute. Hazkunderik handiena Gipuzkoan izan da, %2,8 igo baita prezioa; ondoren Araban, %1,7; eta Bizkaian %0,4.
Igoera horrekin, Gipuzkoa da euskal lurralde garestiena, metro karratuko prezioa 14,6 euroan baitago; ondoren, Bizkaia 12,2 euroan; eta Araba 10,3 euroan.
Hiru hiriburuetako bik prezio altuagoak izan dituzte hirugarren hiruhilekoan. Donostian, jabeen itxaropenak %3,4 hazi dira, eta Gasteizen, %2,2. Bilbon, hileko errentek aldaketarik gabe iraun dute udan.
Hala, euskal hiribururik merkeena Gasteiz da (10,6 euro/m2); Gipuzkoako hiriburua, berriz, hiruren artean garestiena da (15,9 euro/m2), eta, ondoren, Bilbo (12,7 euro/m2). Donostian eta Gasteizen inoizko preziorik altuenean daude alokairuko etxebizitzak.
Etxebizitzen prezioak ere gora
Alokairua bakarrik ez, Euskal Autonomia Erkidegoko etxebizitzen prezioak ere goranzko joerarekin jarraitzen du, %1,15 igo da urteko hirugarren hiruhilekoan. Hala, Gipuzkoan (%2,06) igo da gehien hirugarren hiruhilekoan; Bizkaian (%0,84) txikiagoa izan da igoera, eta Araban (%0,17) izan du hazkunderik txikiena. Urtebetean, %4,66ko gorakada izan dute etxebizitzen prezioek.
Hiriburuei begiratuta, Bilbon igo dira gehien prezioak, %1,25; Donostiak %0,81eko igoerari eutsi dio; eta Gasteizen zertxobait jaitsi dira, -%0,12.