Urtebeterako euriborra sei urtez negatiboan egon eta gero keinu positiboan bukatu zuen apirila. Testuinguru ekonomikoak eta Europako Banku Zentralak (EBZ) interesak igotzeko iragarritako asmoak maiatzean igoera azkartu egin du eta euriborra % 0,282ko batezbesteko tasan bukatu da.
Euriborrak abenduan minimo historikoa izan zuen, -% 0,52, baina lehengaien krsiak eta Ukrainako gerrak eragindako inflazioen gorakadak moneta politika aldatzera behartu du EBZ. Christine Lagarde presidenteak diskurtsoa aldatu ahala euriborraren gorakadak abiadura azkartu du. Aurreko astean Lagardek litekeena tasen igoera uztailean izatea iragarri zuen. Hala balitz, azken hamarkadan egon den lehen igoera izango litzateke. EBZko presidenteak, era berean, hirugarren hiruhilekoan tasak eremu positibora eramateko asmoa ere nabarmendu zuen.
Gauzak horrela, euriborrak gora egiten jarraitzea aurreikusten dute finantza enpresa nagusiek eta badira datorren urtean % 1era iristea espero dutenak ere.
Euriborraren igoerak tasa aldakorreko hipoteka-mailegua dutenei eragiten die. Azken urteetan euriborra negatiboan egon da. Horrek bankuei errentagarritasun gutxi eman eta tasa finkoko maileguak sinatzea sustatu dute. Izan ere, azken hilabeteetan sinatutako maileguen % 70 baino gehiago tasa finkokoak izan dira.
Hala ere, badira tasa aldakorreko maileguak dituzten bezeroak. Araba, Bizkaia eta Gipuzkoan 122.000 bezero baino gehiagok dituzte halako maileguak. Hauek izang dira igoera pairatuko dutenak. Batezbestez hilero kuota 50 euro garestitzea aurreikusten da. Kalkulua 150.000 euroko 20 urteko hipoteka dutenen kasurako egin da.