Euskal Autonomia Erkidegoko administrazio publikoen defizita BPGren %6,5ekoa izan zen 2020an, 4.648 milioi eurora iritsi zen eta 3.981 milioi eurotan handitu zen 2019aren aldean. Euskal Autonomia Erkidegoko administrazio publikoen saldo negatiboa Covid-19aren ondoriozko egoera ekonomikoaren ondorio izan zen, Eustat Euskal Estatistika Erakundeak landutako datuen arabera.
Euskadiko administrazio publikoen saldo negatiboaren hazkundea, 2020an, covid-19aren ondoriozko egoera ekonomikoaren ondorio izan zen, baliabide ez-finantzarioak %5,6 jaitsi baitziren (1.633 milioi gutxiago) eta enplegu ez-finantzarioak %7,8 gehitu baitziren, hau da, 2019an baino 2.348 milioi gehiago.
Saldoaren bilakaera negatibo hori bera erregistratu zen inguruko herrialdeetan eta 27 kideko Europar Batasuneko herrialde guztietan ere, BPGren %6,8ko defizita izan zen eta 6,2 puntu igo zen 2019aren aldean. Espainian, defizita 7,2 puntu gehitu zen, 2019ko BPGren %3,1etik 2020ko %10,3ra.
Erakundeen ikuspegitik, euskal administrazioek (Eusko Jaurlaritza, foru-aldundiak, udal-erakundeak eta administrazio publiko gisa sektorizatutako mendeko erakundeak barne) 1.574 milioi euro egin zuten okerrera beren saldoan, 2019an 769 milioiko finantzaketa-ahalmena (superabita) izatetik 2020an 805 milioiko finantzaketa-beharra (defizita) izatera igaro baitziren.
Administrazio Lurraldetuak ere bilakaera negatiboa izan zuen, finantzaketa-beharra (defizita) 2.406 milioi euroan handitu baitzen, 2019an -1.437 milioiko saldoa izatetik 2020an -3.843 milioikoa izatera pasatuz.
Gizarte Segurantzaren saldoak ere okerrera egin zuen 2020an, 2019an erregistratutakoa baino 1.750 milioi euro gehiagoko defizitarekin; izan ere, finantzazkoak ez diren baliabideek, batez ere gizarte-kotizazioek, %0,08 egin zuten behera, eta finantzazkoak ez diren enpleguek, berriz, %15,2 egin zuten gora.
Zehazki, gizarte-prestazioak, batez ere pentsioak eta langabezia-prestazioak barne hartzen dituztenak, %12,5 igo ziren, 1.397 milioi gehiago, eta 12.586 milioira iritsi ziren 2020an. Gorakada handi hori Covid-19aren ondorioak arintzeko hartutako prestazioei buruzko neurrien ondorio izan zen.