Bizitzaren kostua da Araba, Bizkaia eta Gipuzkoako herritarrei gehien kezkatzen dien gaia. Hala ondorioztatu du Deustuko Unibertsitateak gaur aurkeztu duen Deustobarometroak. %47ren kezka nagusia da bizitzaren kostua, eta %41rena, aldiz, osasun arreta. Dena den, txostenaren arabera, %68k oro har ondo bizi direla aitortu dute.
Ondo bizita ere, ezkortasuna gailentzen ari da nabarmen euskal ekonomian. Gazteen etorkizuna modu ezkorrean ikusten dute %72k, eta %62k azken urteotan erosahalmena galdu duela aitortu du.
Osasuna (%76), hezkuntza (%53) eta adinekoen egoitzetako langileek (%76) egindako mobilizazioak inkestatutako pertsona gehienek babesten dituzte. Aitzitik, Ertzaintzaren mobilizazioak (%29) eta EITBko langileenak (%24) babes gutxiago dute.
Azkenik, Deustobarometroaren arabera, Palestina eta Israelen arteko gatazkak eragina izango du euskal ekonomian (%71) eta %57ren ustez eragin zuzena izango du beren poltsikoan.