2023ko +Industry azokak 20 herrialdetako 800 enpresa erakusketari baino gehiago, eta mila produktutik gora bilduko ditu Barakaldoko BECen ekainaren 6tik 8ra bitartean. Industriarako, digitalizaziorako, fabrikazio aditiborako eta 3D inprimaketarako fabrikazio prozesuen eta horniduren berritasun nagusiak, prozesu industrialetarako ekipamendua, eta aktiboak mantentzeko ekipoak izango dira bertan ikusgai.
Antolatzaileek jakinarazi dutenez, maila goreneko negozio foroa izango da, eta bertan sektorearteko lankidetza bultzatuko da. Halaber, harreman komertzialak erraztuko ditu beren sektoreetan liderrak diren hainbat azoka aldi berean egingo direlako: ADDIT3D, BeDigital, Maintenace, Pumps & Valves eta Subcontratación. Horniduren eta burdindegi industrialaren sektoreak eta WORKinn Talent Hubek ere beren tokia izango dute azokan.
Azoka astearte honetan aurkeztu dute Bilbao Exhibition Centren, eta bertan izan dira Xabier Basañez BECeko zuzendari nagusia, Juan Carlos Ibarrola Lanbideko Enplegurako Lanbide Heziketako zuzendaria, Xabier Ortueta AFM Clusterreko zuzendari nagusia, Iñigo Usandizaga Gipuzkoako Ganberako Subcontex Gipuzkoako arduraduna eta Mari Carmen Gorostiza BECeko Industria, Energia eta IKTetako zuzendaria.
Azaldu dutenez, topaketa "sustapen osoko erakusleiho erakargarria izango da merkataritzaren eta teknologiaren ikuspegitik", eta bertan parte hartzen duten enpresek merkatu eta produktu berriei bidea irekitzera bideratutako irtenbideak eta proposamen komertzialak eskainiko dituzte.
Acciona, Aciturri, Airbus, Ampo, Arcelormittal, Arteche, Bridgstone, CAF, EDP, Gamesa, Gestamp, Henkel, Iberdrola, ITP Aero, Mercedes-Benz, Pepsico, Petronor, Renfe, Sidenor, Siemens, Solvay, Tubacex, Unilever eta Volkswagen Group enpresa handietako ordezkariek jada baieztatu dituzte euren erregistroak azoka bisitatzeko.
BECetik adierazi duenez, "etengabe garatzen" ari den industria aurreratuan, "berrikuntzaren abangoardian mantentzea funtsezkoa da proposamen lehiakorrak eta berritzaileak eskaintzeko". Hori dela eta, +Industryk negozioetarako eta ezagutzaren transferentziarako gune gisa duen profila indartu du sektore anitzeko hitzaldi programa bati esker. Programa horrek industriarako 4.0 soluzioekin lotutako funtsezko alderdiak jorratuko ditu, mundu osoko berrogeita hamar aditu baino gehiagoren eskutik.
Sektore anitzeko hitzaldiak
Hitzaldiaren eremuan, industria aurreratuko azken garapen estrategiekin lotutako funtsezko alderdiek protagonismo nabarmena izango dute.
23 ordu baino gehiago izango dira, eta 50 hizlari adituk baino gehiagok industriarentzat interes handia duten gaiak jorratuko dituzte, hala nola, fabrikazio gehigarria eta 3D inprimaketa, prozesuen digitalizazioa eta automatizazioa, metaberso eta biki digitalak, zibersegurtasun industriala edota 5.0 mantenua.
Halaber, jardueren programak zuzeneko erakustaldiak, Innovation Workshops, networking jarduerak eta B2B topaketak barne hartuko ditu. Azken horietan, nabarmentzekoa da Azpikontratazio Industrialaren Europako XX. Topaketa, herrialdean itundutako B2B elkarrizketa foro handienetako bat, non mila bilera inguru egingo diren.
Antolatzaileek azpimarratu dutenez, +Industry nazioarteko erreferentziazko ekitaldi bat da, eta mundu osoko bisitari adituak erakarriko ditu. Hain zuzen ere, kanpainan zehar, ia 80 herrialdetako profesionalek agertu zuten hitzordura joateko interesa, Alemania, Txina, Arabiar Emirerri Batuak, Estatu Batuak, Frantzia, India, Italia, Mexiko, Portugal eta Erresuma Batua bezalako merkatu garrantzitsuetatik etorriak. Profesional horiek, batez ere, aeronautika, automobilgintza, ekipo ondasunak, trenbide ondasunak, ingeniaritzak, makina-erreminta, ontzigintza, petrokimika, eta banaketa kanalen sektoreetakoak dira.