Euskal Autonomia Erkidegoko kontsumitzaileek batez beste 605 euroko aurrekontuarekin egin beharko diote aurre Gabonei; iaz, ordea, 588 euroko gastua izan zen pertsonako, hau da, aurrekontua %3 igoko da, Cetelem Behatokiaren arabera. Inkestatutakoen %34k aurreikusi du aurten gehiago gastatuko duela, eta soilik %19ak uste du gutxiago gastatuko duela; %47k adierazi du kontsumo mailari eutsiko diola. Opariei dagokienez, %32k inbertsioa handituko du, eta %19k murriztu egingo du.
Perfumeak, moda, jostailuak, liburuak, oinetakoak eta osagarriak dira gehien erosten diren produktuak, baina modan eta jostailuetan beherakada izan da, eta oinetakoetan eta osagarrietan gorakada. Ospakizunei lotutako produktuetan, berriz, %28k gehiago gastatuko du, eta %21ek gutxiago.
Era berean, bigarren eskuko merkatuak indarra galduko du, %32tik %28ra igaroko delako erosleen kopurua, batez besteko gastua 250 eurokoa izanik. Smartphoneak dira nagusi horrelako erosketetan. EAEko kontsumitzaile gehienek online kanala aukeratuko dute erosketak egiteko: %77k aipatu du bide hori, eta %23k, aldiz, denda fisikoetara joko du.