Duela sei hilabete baino aurreikuspen hobeak dituzte Gipuzkoako enpresek

Gipuzkoako enpresek egoera hobean ikusten dute beren jarduera ekonomikoa duela sei hilabete baino. Gipuzkoako Ganberak urrian egindako inkestaren arabera, enpresen %85ak negozio-zifrari eustea edo handitzea aurreikusten du datozen hamabi hilabeteetan, aurreko inkestan baino bost puntu gehiago. 2026ko urtarriletik urrira bitartean, enpresen %42k salmentak handitu dituela adierazi du, ekaineko inkestan jasotako %28aren aldean.

Esportazioek ere bilakaera hobea izan dute. Enpresa esportatzaileen %45ek adierazi dute atzerrian egindako salmentak handitu dituztela 2026an, aurreko neurketan baino 16 puntu gehiago. Datorren urtera begira, %89k esportazioei eustea edo handitzea espero du. Enpleguari dagokionez, enpresen %84k langile kopuruari eutsi dio edo plantilla handitu egin du aurten, eta 2027rako aurreikuspenek egonkortasuna dute oinarri.

Inbertsioek ere gora egin dute 2026an: enpresen %88k inbertsio-mailari eutsi dio edo handitu egin du. Hala ere, datorren urterako aurreikuspenak apalagoak dira. Enpresen %27k inbertsioak handitzea aurreikusten du, %59k maila berean mantentzea eta %14k murriztea. Bestalde, enpresen %40k uste du azken hilabeteetan egoera ekonomiko orokorrak okerrera egin duela, eta %35ek datorren urtean ere okerrera egingo duela aurreikusten du.

Lan-kostuak, ziurgabetasun ekonomiko eta geopolitikoa, errentagarritasun-marjinen murrizketa eta energiaren garestitzea dira enpresen jardueran eragin handiena duten faktoreetako batzuk. Erregulazio-kargek ere gero eta pisu handiagoa dute. Testuinguru horretan, Mauricio Arregui Gipuzkoako Ganberako presidenteak enpresen lehiakortasuna bermatzeko ingurune egokia izatearen garrantzia azpimarratu du.

2027ko erronkei aurre egiteko, Arreguik nazioarteko merkatuak dibertsifikatzeko beharra nabarmendu du, bereziki India, Asiako hego-ekialdea eta Erdialdeko Asia aipatuz. Horrez gain, adimen artifiziala eta energia identifikatu ditu datozen urteetan produktibitatea eta lehiakortasuna bultzatzeko funtsezko bi arlo gisa. Nazioarteko Diru Funtsaren aurreikuspenen arabera, eurogunea %1,2 haziko da 2027an, eta Asiako ekonomia emergenteak, berriz, %4,9.