Udako hilabeteetan bidaiak ugaritu egiten diren arren, aireportu guztiek ez dute bilakaera bera izan: batzuek bidaiari gehiago izan dituzte eta beste batzuek, gutxiago. Aenak Hego Euskal Herriko uztaileko datuak eman ditu.
Bilboko aireportuak 806.402 bidaiari erregistratu ditu uztailean, 2025eko hilabete berarekin alderatuta %16,8 gehiago. Hazkundea bereziki nazioarteko trafikoan nabaritu da: bidaiari kopurua %27,7 handitu da, 426.289 bidaiariraino. Barneko hegaldi komertzialetako trafikoa ere igo da, %6,6, 378.924 bidaiarirekin. Guztira, 5.739 lurreratze eta aireratze izan dira, iazko uztailean baino %14,9 gehiago. Urteko lehen zazpi hilabeteetan, 4.367.752 bidaiari eta 32.419 operazio pilatu ditu, %9,6 eta %3,9ko igoerekin, hurrenez hurren.
Gasteizko aireportuak izan du uztailean bigarren hazkunderik handiena bidaiari kopuruari dagokionez: 32.801 bidaiari izan ditu, iazko uztailean baino %19,5 gehiago. Gainera, 1.460 lurreratze eta aireratze egin ditu, 2025ean baino %9,4 gehiago. Urteko lehen zazpi hilabeteetan, 223.226 bidaiari pilatu ditu, 2025eko aldi berean baino %29,8 gehiago, eta 8.877 operazio, %6ko hazkundea izan du, alegia.
Hondarribiko aireportuak ere gora egin du uztailean, baina erritmo motelagoan. Guztira, 49.510 bidaiari izan ditu, 2025eko uztailean baino %3,6 gehiago, eta 784 operazio egin dira, iaz baino %15 gehiago. Urtarriletik uztailera, 277.200 bidaiari igaro dira aireportutik, iazko aldi berean baino %0,8 gehiago, eta 3.804 lurreratze eta aireratze egin dira, urte arteko %0,7ko hazkundearekin.
Iruñean, aldiz, joera bestelakoa izan da, aireportutik igaro den bidaiari kopurua iazkoa baino txikiagoa izan delako. Beherakada %2koa izan da, 20.175 bidaiarirekin. Operazioak ere %0,5 gutxitu dira, 812 mugimendurekin. Hala ere, urteko lehen zazpi hilabeteetako balantzea positiboa da: 141.880 bidaiari izan ditu, iazko aldi berean baino %6,4 gehiago, eta 4.589 lurreratze eta aireratze, %14,8ko igoerarekin.
Gehitu EnpresaBIDEA Google-ren iturri hobetsi gisa doan
Egon zaitez azken berriekin informatuta