Zuzendari berria du Bai Euskarari Elkarteak, Rober Gutierrezen lekukoa hartuko baitu Ibon Arrizabalaga de Mingok. Arrizabalaga Orion jaio zen 1973an, eta Arte Ederretan lizentziatua da nahiz eta beste esparru batzuetan jorratu duen bere ibilbide profesionala. Azken 20 urteotan Arremanitz kooperatibako kide izan da, eta Bai Euskarari Elkarteko zuzendari kargua “pozik eta arduraz” hartu du.
Lan munduan euskararen erabilera areagotzea du xede Bai Euskarari Elkarteak. Gutierrezek 25 urte eman ditu proiektuan, Kontseiluan lehenengo eta elkartearen zuzendaritzan ondoren. Bai Euskarari ziurtagiriekin hazi zuten ibilbidea. Gerora, hainbat proiektu propio sortu dituzte, hala nola Enpresarean, Lansarean enplegu-ataria, Euskaragileak edota Elkarrengandik Ikasiz solasaldiak. Halaber, beste erakunde batzuekin elkarlanean Lazarraga Sariak, Euspot Lehiaketa edota Beterri-Saretuz bezalako egitasmoak ondu dituzte, eta orain, hainbat erakunderi (Arabako Enpresen Foroa, Euskara Langai...) zerbitzuak eskaintzen hasiak dira.