2022eko urriaren 6a
Industria produkzioa %4 hazi zen Euskal Autonomia Erkidegoan abuztuan, 2021eko hil beraren aldean, Espainiako batez bestekoa baino 1,8 puntu gutxiago. Nafarroan, berriz, datua hobea da, %13,6ko igoera izan baitzuen abuztuan, urtebeteko aldean. Hala jakinarazi du Espainiako Estatistika Institutuak (INE).
Urtarriletik abuztura bitarteko datuei erreparatuz gero, Erkidegoan %6ko hazkundea izan du industria produkzioak, eta %4,2koa Nafarroan. Biak ere Espainiako batez besteko %3,5etik gora.
Espainiako gainerako erkidegoei begiratuta, Balear Uharteak izan ziren adierazle horren urte arteko hazkundearen liderrak abuztuan, %17,3ko igoerarekin; aldiz, Kantabria izan zen datu negatiboak izan zituen erkidego bakarra, %4,9ko jaitsiera izan baitzuen.