Eustaten estatistika erakundeak emandako azken datuen arabera, Euskal Autonomia Erkidegoko industria prezioak %0,9 apaldu ziren martxotik apirilera. Azken hamabi hilabeteetan, aldiz, hau da, 2024ko apirilarekin alderatuta, sektoreko prezioak %1 hazi dira.
2025eko apirilean aurreko hilabetearekin alderatuta prezioetan jaitsierarik handienak izan dituzten azpi-sektoreak petrolio findegiak (%5,3ko jaitsiera) eta energia elektrikoa, gasa eta lurruna (%3,4) izan dira. Aldiz, prezioetan hiletik hilerako igoerarik handienak izan dituzten azpi-sektoreak honakoak izan dira: Informatikako, elektronikako eta optikako produktuen fabrikazioa (%1,8), makineriaren eta ekipoen fabrikazioa (%1,8) eta ura (%1,7).
Ondasunen helburu ekonomikoaren araberako sailkapenari jarraituz gero, martxoaren aldean, energiaren prezioak %4,4 jaitsi dira, ekipo-ondasunenak %0,5 eta bitarteko ondasunenak %0,1. Kontsumo-ondasunetan, prezioak %0,2 igo dira, batez ere, kontsumo-ondasun iraunkorren prezioak %0,6 igo direlako eta kontsumo-ondasun ez-iraunkorrenak %0,1.